𝑷𝑬𝑫𝑹𝑶 𝑩𝑬𝑳𝑶 : 𝑷𝑵𝑻𝑳 𝑱𝑼𝑹𝑨 𝑩𝑨 𝑹𝑨𝑰 𝑵𝑶 𝑩𝑨𝑵𝑫𝑬𝑰𝑹𝑨 𝑯𝑶𝑫𝑰 𝑺𝑬𝑹𝑽𝑬 𝑫𝑬𝑰𝑻 𝑬𝑺𝑻𝑨𝑫𝑼

Same, 21 fevereiru 2025 (SRP) – Ministru Interiór, Francisco da Costa Guterres, Ph.D, hamutuk ho Segundu Komandante Jeral PNTL, Komisariu Polisia Pedro Belo, hala’o vizita servisu ba Komandu PNTL Munisípiu Manufahi, hodi haree besik liután kondisaun ne’ebé membru sira enfrenta.

Komandante Komandu Munisipiu Manufahi, Superintendente Assistente Polisia, Domingos Grigorio Soares, kongratula Ministru Interior nia vizita hodi bele buka solusaun ne’ebe Komandu PNTL Manufahi hasoru

“Ami senti kontenti ho vizita Ministru Interior ho komitiva mai hodi bele hatene ami nia situasaun no preokupasaun liu-liu difikuldade ne’ebe ami hasoru fo mos apresiasaun ba Komandu Munisipiu Manufahi ”, dehan Komandante Domingos Gregório, durante halo introdusaun iha Komandu PNTL Munisipiu Manufahi, (21/02/2025).

Domingos Gregório subliña, nia akumula hotu ona difikuldade ne’ebe nia membru sira hasoru, em jeral maka problema menus rekursu umanu, fasilidade apoiu servisu no-mos infraestrutura baziku.

“Aproveita vizita ida ne’e hakarak informa mos katak ami presija tan konstrusaun kazerna ba komandu minimu tolu, gala ba ajente to’o sarjentu, fundus anual extra, ekipamentu kontrola tási nian tanba ami hela besik tási, transporte ba patrulla, kilat bot no espada wainhira partisipa iha serimonia nasional, ropa detensaun ba detidu inklui halo check up ba ami nia membru sira”, tenik tan.

Hatan ba ida ne’e, Ministru Interior hateten nia parte halo ona esforsu hodi aselera lalais prosesu sira hotu nunee bele fasilita PNTL sira nia servisu ba komunidade ho diak.

“Hanesan ajente seguransa estadu nian ita bot sira sai hanesan pilar importante ba nasaun ida ne’e, PNTL hamrik hodi suporta estadu. Hau bele dehan laiha seguransa maka laiha dezenvolvimentu. Tan ne’e seguransa diak ona maka dezenvolvimentu bele lao. Portantu preokupasaun hirak ne’e balu iha ona maibe seidauk to’o no ita nafatin esforsu an hodi komplementa preokupasaun hirak ne’e”, afirma.

Governante ne’e hatutan, ekipamentu apoiu servisu balu iha ona no balu ne’ebe identifika tau ona iha planu hodi kontinua ba iha prosesu tenderizasaun. Enkuantu kona-ba prosesu infraestrutura ekipa tekniku sira halo ona “prototype”.

“Formasaun tenke halo bebeik, halo tuir standard operating procedure (SOP), ne’ebe iha hodi halo atuasaun ho profisional. Imi hare imajen ida viral iha media sosial kona-ba tranzitu feto ida fo kontinensia antes halo pasa revista liu hosi check point ba motorista sira, ida ne’e hatudu imajen profisional hosi PNTL. Tanba ne’e serve nasaun ne’e ho fuan tanba povu depozita konfiansa ba imi”, dehan tan.

Governante ne’e rekunese, maske PNTL hasoru difikuldade oi-oin estadu sei tau matan hadi hadia dezafiu hirak ne’ebe instituisaun ne’e hasoru.

Okajiaun ne’e Francisco Guterres, husu atu membru PNTL hotu labele inkliña an iha kualker grupu no partidu politiku hodi hafraku instituisaun estadu ida ne’e.

“Se deit mak mai imi nafatin PNTL labele hakfodak halai tuir partidu ida hodi ba jura tun sa’e. Tau ses tiha hosi influensia politika no organizasaun Grupu Arte Marsiais. Imi lembra momentu ne’eba deviza 4 deit no laiha kareira promosaun. Hau tama iha 2007 hau hatene PNTL ne’e estadu nian hodi proteje povu, laos partidu ka grupu ida nian. Imi sa’e deviza laos grupu ida maka haruka maibe imi nia kapasidade, disiplina no profisional ne’e maka ema fiar. Ami despolitiza PNTL para imi servisu diak, agora daudaun ita halo promosaun tranzitoriu ne’e atu rezolve tiha imi nia problema tanba balu uluk hamutuk ho Komandante Jeral no kaer komandante eskuadra sei nafatin ho postu ajente xefi”, fo hanoin.

Iha biban ne’e Ministru Interior fo mos hanoin atraves Komandu PNTL Munisipiu Manufahi atu oinsa orienta nia membru sira servisu hamutuk ho komunidade hodi hare ba povu nia moris hakmatek.

Iha fatin hanesan, Segundu Komandante Jeral PNTL, Komisariu Pedro Belo, lori Komandu Jeral nia naran agradese ba IX Guvernu liu hosi esforsu Ministeriu Interior hodi moderniza instituisaun PNTL.

“Agradese ba Ministru Interior nia programa ne’ebe diak tebes, hahu kedas hosi misaun UNTAET nia tempu to agora kontinua halo infraestrutra baziku liu hosi bairu PNTL, eskuadra no Kuartel, se ema seluk mak mai karik haluha ona ita. Tanba ne’e oportunidade ba Komandu Munisipiu buka rai lalais aproveita tinan lima ne’e tanba seluk mai fali sei lahanesan. Ohin Ministru mos esplika ona ne’ebe itá nia estatutu mos dehan ona iti tenke disiplina. Kuandu servisu iha ekipa karik ba atende problema ruma team leader maka koalia hodi kontinua halo relatoriu atividade nian.

Pedro Belo alerta ba Komandu hotu atu halo TOT (Training of Trainer), hodi hasa’e abilidade no koñesimentu membru sira-nian atu sai treinador ne’ebé di’ak.

“Husu ba Komandante Munisipiu tenke halo formasaun bebeik ba membru sira no halo pedidu ba nasional kona-ba materia saida maka presija. Task Force sira presija treinu silu malu ka riba malu hodi atua problema perturbasaun ordem publik tanba tuir ona formasaun ne’e tenke aplika. Maibe wainhira atende kazu ruma tenke uza forsa ho profisonal, proporsional, neutral ka nesesariu no wainhira entrega servisu presija halo briefing antes uluk ba malu”, sujere.

Antes termina, komandante fitun ida ne’e husu membru PNTL hotu atu labele inkliña an partidu politiku no grupu arte marsiais no rituais ne’ebe guvernu bandu ona, tanba PNTL jura ba rai bandeira ida ho misaun klaru atu servi povu no nasaun ida ne’e. #AX