Aileu, 05 outubru 2023 (SRP) –Ministru Interiór, Francisco da Costa Guterres, Ph.D, hamutuk ho Komandante Jerál PNTL, Komisáriu Jerál Henrique da Costa, hala’o vizita servisu ba Komandu PNTL Munisípiu Aileu, hodi haree besik liután kondisaun ne’ebé membru sira enfrenta no analiza problemas hirak ne’ebé iha, nune’e, Governu liuhusi Ministériu Interiór bele iha kbiit atu buka solusoens ne’ebé PNTL Aileu hasoru.
Francisco da Costa Guterres, Ph.D, vizita dahuluk ida-ne’e, mai atu motiva sira, hodi servisu ho di’ak liu, mesmu ho kondisaun ladun diak ba sira, maibé sira mantein firme no eleva sira-nia espíritu hodi bele servi nasaun ida-ne’e.
“Ha’u-nia vizita ida-ne’e mai para atu haree sira-nia kondisoens, ita ezije sira halo servisu, ita mós tenke kria kondisaun ida ba sira atu nune bele investe infraestrutura. Ita tau ona iha planu para hari kuartel PNTL iha munisípiu-Aileu inklui rehabilitasaun ba Eskuadra, hodi nune’e bele halo servisu ho di’ak”, dehan Ministru Interior, Francisco Guterres, ba jornalista sira iha Kuartel PNTL Aileu, kinta feira ne’e.
Nia dehan, planu prioridade agora maka oinsa atu reforsa lejislasaun no regras nune’e bele halo modernizasaun ba instituisaun PNTL ne’ebé simu responsabilidade tomak ba seguransa interna hodi hametin lei no seguransa publiku nasaun nian.
Iha fatin hanesan, Komandante PNTL Munisípiu Aileu, Superintendente Polísia, Sebastião Alves Quintão, haksolok ho vizita ne’e hodi bele motiva di’ak liután nia membru sira. Inklui aprezenta mós progresu servisu no dezafius ne’ebé mak durante ne’e sira hasoru.
“Ami agradese tebes hetan vizita espesiál hosi Ministru Interiór mai iha fatin ne’e. Hanesan komandante ha’u kontente tanba ho vizita ne’e bele fó motivasaun di’ak liután ba membru PNTL Aileu nian. Iha ne’e atu aprezenta mós preokupasaun hosi membru balu mak kona-ba ekipamentu no rekursu umanu limitadu”, dehan Komandante Sebastião.
Iha biban ne’e, Sebastião relata mós kazu insidente no asidente tinan kotuk inklui tinan 2023, hahú hosi fulan janeiru to’o setembru nian.
“Kazu iha fulan janeiru to’o ohin loron totál kazu hamutuk 67. Kazu sira nee aprezenta ona ba Ministériu Públiku (MP), 31 rezolve família no kazu seluk sei pendente hodi hein prosesa no balu presija kompleta dokumentu ba MP. Iha mós kazu tránzitu ne’ebé halo atividade rodoviária nian infratór sira selu koimas ne’ebé tama kofre estadu iha tinan kotuk rihun tolu resin. Hosi fulan janeiru to’o ohin loron iha 227 dollares”, salienta.
Vizita Ministru Interior ne’e, hetan mós akompañamentu hosi parseria permanente PNTL nian hosi TLPDP (Timor-Leste Police Development Program), ne’ebé reprezenta hosi Mark Silvertand no asesór TLPDP Jose Turquel. # (Elisa, Oscar).
