Díli, 14 jullu 2023 (SRP) – Ministru Interior, Francisco da Costa Guterres, Ph.D, hala’o vizita mai Komandu Jerál PNTL hodi hala’o enkontru ho estrutura tomak Komandu Jerál PNTL nian hodi buka hatene kona-ba progresu servisu no dezafiu ne’ebé instituisaun PNTL hasoru nune’e bele buka solusaun hamutuk ho Guvernu.
Vizita ba dahuluk ne’e Ministru Interior simu direta hosi Komandante Jerál PNTL, Komisáriu Jeral Henrique da Costa, no-mos Segundu Komandante Jerál PNTL, Komisáriu Polísia, Pedro Belo, hamutuk ho Komandante Unidade, Komandante hosi Munisípiu sira inklui RAEOA no ofisiál superiór sira seluk liuhosi guarda de honra.
“Governu iha komitmentu hodi hadia sira-nia infraestrutura. Iha ne’e Ami haree ona katak, infraestrutura, kestoens ekipamentus no sira seluk, Governu sei tau atensaun mós ba Transportes”, esplika Ministru Interior, Francisco Guterres, ba jornalista sira hafoin remata enkontru ne’e Kuartel Jerál PNTL, Caicoli, sesta (14/07/2023).
Nia dehan, preokupasaun komandu nian durante enkontru ne’e maka iha area infraestrutura, lojístika, ekipamentus apoia servisu no transporte hodi tau mós iha prioridade.
“Liga ba infraestrutura, ita kompromete iha tinan 2024, sei hahú lansamentu ba iha Kuartel Jerál, no ninia prosesu deit mak sei rezolve iha tinan ida-ne’e inklui rezolve nia mekanizmu sira”, subliña.
Governante ne’e salienta, atu hadia di’ak liután prestasaun servisu PNTL nian iha atendimentu publika nian presija kria kondisaun ne’ebé di’ak nune’e ema hotu bele iha vontade hodi servisu hodi haforsa liután paz no estabilidade iha Timor-Leste.
Kestiona kona-ba estatutu PNTL, Ministru Interior hateten sei halo revizaun ba Estatutu no lejilasaun ba diplomas legál sira.
“Ita sei halo mós revizaun ba Lei, rejime salariál no rejime karreira, nune sira bele dezempeña sira-nia servisu ho di’ak liután tuir sira nia kondiasaun servisu”, afirma.
Iha biban ne’e, Francisco Guterres, lori Primeiru-Ministru nian naran kongratula estrutra PNTL tomak ba progresu iha durante eleisaun parlamentar em termu komportamentu lei no orden no-mós respeitu diretus umanus ne’ebé lao di’ak tebes no Guvernu iha komprimisiu atu moderniza PNTL sai profisionál liután.
“Ita tenke agradese ba PNTL sira tanba, PNTL sira mak Pilar esensiál liu ne’ebé mak tau hela seguransa ba prosesu sira. Tanba sira konsege hala’o servisu ne’ebé mak di’ak iha tempú eleisaun datoluk, hanesan eleisaun prezidesiál dahuluk no daruak nomós eleisaun parlamentar ho di’ak, tanba sira-nia servisu hodi fó apoiu no kolaborasaun di’ak ho ema hotu”, hakotu. # Ekipa Media-MI.
