Atabae -loron 2 fulan dezembru 2023 (SRP)- Vise Ministru Administrasaun Estatal Vise-Ministru Administrasaun Estatál Jacinto Rigoberto G. de Deus hamutuk ho ekipa fó palestra kona-ba Jestaun Finansas ba formandus kazuais iha Rairobo.
Vice Ministro MAE Jacinto Rigoberto Gomes de Deus, afirma katak, Ita-nia nasaun atu lao ho diak presija Administrasaun ne’ebé diak no forte, tanba ukun-an tinan 24 ona maibé ita-nia administrasaun sei sentralizadu makas iha nasionál, iha Nunu Governu nia mandatu ne’e atu hahú implementa Desentralizasaun Poder Lokál no kompetensia sira husi nasionál sei deskonsentra ba Munisipius.
Nuno governu konstitusionál fó prioridade atu hahú implementa desentralizasaun poder lokál. Desentralizasaun poder lokál nee katak kompetensia inklui jestaun administrativa, jestaun finansas komesa hatún dadauk ona ba Munisípiu, postu no suku sira. Ba ida-nee bainhira kuandu lao diak presija rekursus no tenke preparadu, akresenta Vise Ministru Administrasaun Estatal.
“Imi-nia prezensa iha munisípiu, postu no suku prosesu desentralizasaun ne’e komesa lao dadauk ona. Haree ba esperiénsia ne’ebé maka liu tiha ona administrasaun suku, jestaun suku sira balun lao diak, balun arraska oituan maibé servisu kontinua lao”.
Nudar sidadaun diak imi iha direitu no dever, moris iha rai ida-nee, iha direitu hanesan mós sidadaun seluk iha mundu, direitu ba Servisu, direitu ba eskola no seluk seluk tán. Nudar sidadaun iha dever atu kontribui ba ita-nia aan rasik, família no estadu.
“Haree husi imi-nia oin, iha imi-nia laran iha perguntas barak, bainhira mak hau bele kontribui ha’u-nia aan para dezenvolve nasaun ida-nee. Ohin iha oportunidade diak Ministériu Interior fó ona konfiansa ba imi para bele hahú kontribui ba prosesu dezenvolvementu nasaun ida-nee. Nasaun ida-nee ita hotu-hotu nian no ita hatene, iha loron 28 novembru liubá ita foin komemora aniversáriu ba dala 48. Molok atu komemora tinan 48 nee ema hira ona mak fakar ruin no ran, ho objetivu mak atu komemora loron ne’e nudar nasaun ida independente no soberanu ho ninia Bandeira Nasionál”, membru IX governu konstitusionál komenta.
Molok imi atu kontribui ba dezenvolve nasaun ida-nee dever lideransa no Ministériu nian fó netik bukae ruma ba imi hodi halao servisu ho diak no hatene saida mak imi atu halo. Kontente teb-tebes tanba ita boot sira sei destaka ba postu administrativus, munisípius ne’ebé maka nudar territóriu administrasaun estatál ninian.Fó motivasaun no korajen ba imi nudar funsionáriu kazuais tenke servisu ho profesionál. #Fatinha.
