OÉ-CUSSE, 27 novembru 2023 (SRP) – Ministru Interior, Francisco da Costa Guterres, Ph.D, kongratula veteranus 182 ne’ebe simu kondekorasaun hosi Prezidente Repúblika, José Manuel Ramos Horta, iha Rejiaun Administrativa Espesiál Oé-Cusse Ambeno (RAEOA).
“Hau kontente tebes mai iha ne’e lori Primeiru-Ministru nia naran hakarak fo parabens ba veteranus sira ne’ebe luta hodi liberta povu ho rai doben Timor-Leste. Ohin estadu atribui ho orden hosi komandante ein-xefi Nicolau dos Reis Lobato, nu’udar rekoñesimentu no valorizasaun Estadu ba asaun patriotizmu no sira-nia asaun ba nasaun Timor-Leste nia ukun rasik-an”, dehan Francisco Guterres, durante halo nia diskursu iha Hotel Bintang Lima Oe Upu, Suku Costa, Sub-Rejional Pante Makasar, RAEOA.
Nia hateten, Kondekorasaun ne’e sei iha kontinuasaun ho fazeadamente ba kombatente sira hotu iha territóriu nasionál tomak ne’ebe luta hodi liberta rai ida ne’e hosi invazor sira.
“Kada tinan Estadu kondekora ba eroi hirak ne’ebe partisipa iha luta durante tinan 24.
Kondekorasaun ida-ne’e hanesan direitu pertinente ba Kombatente Libertasaun Nasionál ne’ebe prevista ona iha Lei. Entaun rekuñesimentu no valorizasaun hosi Estadu ida ne’e tanba ita bot sira fo ona kontribuisaun no dedikasaun no kolaborasaun ba luta Independénsia nasaun nian”, subliña.
Governante ne’e salienta katak veteranu sira-nian sakrifisiu iha prosesu luta boot tebes tanba ne’e ho esforsu ne’ebé Estadu halo hakarak valoriza netik kontribuisaun ne’ebé sira oferese ona ba rai ida ne’e.
“Kontinua kontribui ba rai ida ne’e tanba papel veteranu importante tebes iha konstrusaun estadu, tanba ne’e husu atu ajuda nafatin estadu hatutan mehi ne’ebe iha ona no lori dezenvolvimentu ba rai ida ne’e”, afirma Ministru Francisco Guterres.
Entretantu serimónia kondekorasaun ne’e atribui direitamente hosi Konsellu Veteranus RAEOA nian ba veteranus hamutuk na’in-182, hosi Suku 18, ne’ebé simu rekoñesimentu ne’e iha ámbitu komemorasaun loron proklamasaun indepensia Timor-Leste ba dala-48 nian. # (Oscar/AX).
