Dili, 08 agostu 2023 (SRP) – Profesor no Dekanu hosi Universidade Nova Wales Sul (Sigla Ingles; UNSW) Austrália, Stephen J Foster, hamutuk ho komitiva, hasoru malu ho Ministru Interior, Francisco da Costa Guterres, Ph.D, hodi hametin parseria iha area seguransa nian.
“Ohin ami mai hasoru Ministru-Interior no introdus ami-nia papel Universidade nian nu’udar kriadór no diseminadór koñesimentu no nu’udar motór prinsipál ba inovasaun, dezenvolvimentu ekonómiku no moris-di’ak sosiál. Ami mós deskute prioridade estratéjika ba impaktu sosial iha area seguransa nian, dezastre, redusaun risku no jestaun; enjeñaria ambientál no umanitária, infraestrutura reziliente inklui seguransa bee-mos no enerjia”, esplika Profesór Stephen J Foster, hafoin remata enkontru ne’e iha Vila-Verde, tersa ne’e.
Nia dehan, durante loron 7 to’o 11 agostu, delegasaun husi UNSW sei vizita Dili hodi halo interasaun introdutoria lubuk ida ho Nasoins Unidas, Governu Timor-Leste, Akademia no-mós Sosiedade Sivil sira.
“Sorumutu introdutóriu ne’e hanesan parte ida husi asaun lubuk ida-ne’ebé UNSW hahú hodi kontribui atu harii relasaun institusionál sira ba estabelesimentu no reforsu parseria koñesimentu estratéjiku sira ne’ebé tulun hasoru dezafiu dezenvolvimentu sustentavel sira iha rejiaun Ázia Pasífiku”, subliña.
Tuir, Profesór Stephen, prioridade estratéjika ba impaktu sosiál husi Universidade ne’e kompromete atu taka problema sira iha mundu reál liuhusi parseria sira ne’ebé halibur estudante sira, pesoál sira, alumni sira no komunidade sira, hodi aliña esforsu ho esperiénsia no forsa peskiza husi UNSW ba Dezenvolvimentu Sustentavel Nasoins Unidas nian.
“Ami sente kontente bele hasoru malu ho Ministru no ohin ami halo ona introdusaun institusionál hodi buka komprende imperativu estratéjiku sira Ministériu Interior nian hodi nune’e bele esplora parseria institusionál ba advokasia no kolaborasaun, liuliu atu kontribui ba Objetivu Dezenvolvimentu Sustentavel (sigla ingles;SDGS) no impaktu sosiál iha Timor-Leste”, salienta.
Professor Stephen hatutan, liuhusi apoiu no Programa Formasaun Diplomasia, ne’ebé harii husi Prezidente Ramos-Horta iha UNSW iha tinan 1989, UNSW iha ligasaun naruk ho Timor-Leste. Hahú husi tinan 2009, peskizadór sira husi UNSW suporta ona reforsu sistema saúde publika iha parseria ho Ministeriu Saúde no foin lalais ne’e, UNSW fornese ona formasaun pos-graduaduadu iha área jeolojia ekonómika hodi suporta Ministériu Petroleu no Minerais nune’e UNSW buka atu harii istória ida-ne’e hodi hakle’an liután ninia envolvimentu institusionál iha Timor-Leste.
Iha okajiaun ne’e, Ministru Interiór, mós hato’o agradesimentu ba delegasaun UNSW hosi Austrália tanba bele esforsu ho vontade no hanoin di’ak servisu hamutuk hodi apoia Guvernu Timor-Leste iha area seguransa nian. #
Autor : Abuy
Editora : Fatinha
Fotos : AX
