DILI, 01 setembru 2023 (SRP) – Komandante ba Programa Dezenvolvimentu Polísia Timór-Leste (sigla Inglés TLPDP), Superintendente Darren Booy, hala’o enkontru ho Ministru Interior, Francisco da Costa Gueterres, Ph.D, hodi koalia kona-ba esbosu foun ida nu’udar oportunidade importante ba dezenvolvimentu profesionalismu PNTL (Polísia Nasionál Timor-Leste) nian.
“Ohin ami hasoru malu ho Ministru Interior, ami koalia kona-ba oportunidade atu renegosia memorandu entendementu (MoU) foun entre Austrália no Timor-Leste atu hetan apoiu hodi dezenvolve PNTL. Ami mós halo diskusaun klean no iha fulan balu nia laran ami sei halo enkuadramentu foun kona-ba kooperasaun servisu iha tinan lima oin mai”, dehan Komandante Darren Booy, hafoin remata enkontru ne’e iha Ministériu Interior, sesta ne’e.(01/09/2023).
Darren, salienta TLPDP sei nafatin fó apoiu ba PNTL bazeia ba programa prioridade ne’ebé trasa ona nune’e PNTL bele sai profesionál liután.
Komandante ba Programa Dezenvolvimentu Polísia Timór-Leste Superintendente Darren Booy ho nia asesór enkontru ho Ministru Interior
Entretantu Ministru Interior, Francisco da Costa Guterres, Ph.D, hateten MoU ezistente ne’e antes ne’e asina iha 2003 tama ba iha tinan-20 no presija iha mudansa balu.
“Iha mudansa barak akontese no presiza iha alterasaun hodi ajusta ho mudansa sira ne’e atu nune’e bele responde ba dezafiu sira ne’ebé mak PNTL hasoru no ita sei mantein kooperasaun bilaterál ne’e bele la’o ho di’ak nafatin”, dehan Ministru Francisco.
Ezekutivu ne’e salienta, esbosu foun ne’e atu haforsa setór seguransa entre Timór-Leste no Austrália ne’ebé antes ne’e hala’o tiha ona liuhosi kooperasaun entre PNTL no Polísia Federál Austrália (AFP;sigla ingles).
“Liga ba kooperasaun MoU ne’e sei asina iha tempu besik, ekipa Ministériu Interior sei koordena ho TLPDP hodi haree asuntu ida ne’e, mais em prinsípiu TLPDP komprometidu apoiu nafatin PNTL”, subliña.
Governante ne’e hatutan, Governu liuhusi Ministériu Interior kontinua hametin relasaun di’ak ho Guvernu Austrália hodi ajuda nafatin PNTL iha futuru. # (Bui, Fatinha, AX).
