DILI, 19 Fevereiru 2024, SRPM-Ajénsia (TIC.TIMO.IP-Sigla Portugés), liu osi Diresaun Dezenvolvimentu Sistema Informasaun no Aplikasaun(DDSIA), atribui sertifikadu apresiasaun ba funsionáriu husi Departamentu Servisu Relasaun Públika no Media-(Ministériu Interior), liuhosi formasaun kona-ba Jestaun Administrasaun Portál “WEBSITE”.
Iha serimónia enseramentu ne’e, Asesór Diresaun Nasionál Prevensaun Konflitu Komunitáriu-DNPKK, Francisco Simões, ne’ebé reprezenta Xefi Gabinete Ministériu Interior, agradese ba apoiu ne’ebé husi Ajénsia TIC.TIMOR.IP, fó liuhosi fasilita formasaun ba funsionáriu media hodi atualiza servisu ou atividade Ministériu nian.
“Ema koñese Governu husi Ministériu Interior liuhusi média, tamba ita hotu hatene katak média maka agora dadaun domina mundu, ne’ebé ema bolu dehan téknolojia avansadu”
“Iha Governu anterior hira liuba (2017) ita estabelese ona website, maibé depois ida-ne’e ita lakon buat hotu no ita fila fali mai manuál” dehan nia.
Nia mós fiar katak, formasaun sei lakotu iha ne’e deit, sei kontinua e lori dezenvolvimentu iha área média, tanba média maka sai fonte informasaun ba populasaun no ministériu atu nune’e povu mós bele akompaña progresu dezenvolvimentu no progresu lubuk ida ne’ebé sei iha futuru mai.
Formandus, Dir. TIC, Asesor Francisco Simoes no DJAF inklui formador sira
Entertantu, Diretór Diresaun Dezenvolvimentu Sistema no Informasaun no Aplikasaun, Justo Fernandes, agradese formadu sira tanba bele tuir ona formasaun ida-ne’e, ho objetivu hodi atualiza informasaun sira ba iha portál hodi nune’e publikú hatene atividade servisu Ministériu nian.
“Ha’u hanoin la’os loron ikus hodi sira konklui ona sira nia formasaun ne’ebé apoiu ne’ebé husi TIC.TIMOR, maibé ami kontinua nafatin fo apoiu tamba hatene katak formasaun loron 3 la sufisiente satan husi Sistema no buat foun ne’ebé ita aprende no ita sei matan tomak, no ita tenki presija aprende barak liutan” dehan Justo Fernandes.
Diretór nia parte salienta katak, husi Ajénsia TIC.TIMOR.IP, prontu halo mós mudansa iha Layout ba iha WEBSITE Ministériu ninian , hodi bele refleta ba iha atividade Ministériu ninian nomós prontu fó apoiu téknika ba parte ne’ebé maka husi formadu sira seidauk apar no domina, no husu nafatin ba iha formadór sira ténki prontu kolabora iha kategoria menu balu ne’ebé maka seidauk priense no hakarak iha mudansa bele kontaktu ekipa tékniku sira.
Depois de remata formasaun ne’e, entrega mós sertifikadu apresiasaun ba formadu nain lima, ne’ebé tuir formasaun kona-ba Jestaun Administrasaun Portál “WEBSITE”, durante loron lima.
Nia dehan, sertifikadu ne’e hanesan rekoñesimentu ida katak sira tuir ona formasaun, maske nivel koñesimentu seidauk to’o iha ministériu nia hakarak, maibé ida ne’e mak formador sira iha.
Serimónia ne’e partisipa husi Diretór Jerál Administrasaun Finansas, Mariano de Araújo, Xefe Departamentu Servisu Relasaun Públika no Média, Oscar Lopez, Formadór Ajénsia TIC.TIMOR.IP no ekipa Média husi MI.
