Liquiça, 01 abril 2024 (SRP) – Polísia Nasionál Timor-Leste (PNTL), liu hosi Servisu Informasaun Polísia Nasionál (SIPN), junta hamutuk ho Unidade Falintil (UF), asegura ona joven mane nain 3, envolve krime Burla Agravadu hodi naok osan loja nian ne’ebé lokaliza iha Suku Leopa, Postu-Administrativu Liquica, Munisípiu Liquiça.
Hafoin halo monitorizasaun ba kamara vizilánsia, Komandante SIPN hatun diretiva no ordem servisu ba membru sira halo vizilánsia durante loron tolu nia laran hodi buka informasaun kona-ba autór prinsipál nain 4, ekipa konsege kaptura suspeitu nain 3 no rekolla mós evidénsia iha fatin ne’ebé lahanesan.
Tuir kamara vizilánsia ne’ebé iha, suspeitu sira utiliza karreta kor malahuk marka prado maibé sira kola metin tiha xapa matríkula no uza modus falun oin metin no balu uza maskra selok odamatan hodi tama ba loja laran. Wainhira vítima loke odamatan suspeitu nain tolu kaer metin vítima nia liman hodi ta’a kona vítima iha parte liman loos hafoin sira kesi metin vítima nia liman ain inklui kakorok.
Ho asaun ida-ne’e suspeitu sira konsege foti osan brankas husi kuartu laran lori ba tula iha karreta prado ne’ebé para iha liur no osan iha brankas laran hamutuk montante USD 5.000.00 no sasán seluk hanesan sigarru, osan mean, inklui serveja ho marka ABC.
Ekipa servisu utiliza kapasidade téknika no intelektuál halo vizilánsia ho apoiu teknolojia infromasaun ne’ebé adekuadu no konsege identifika tán karreta kik ida ho marka CX7, xapa matríkula klaru ne’ebé antes ne’e sira uza hodi halo asaun naok uluk osan ho montante USD 1.21,50, telefone 3, mina morin no osan mean iha loja Xina nian iha Kampung Baru Dili.
Ekipa kontinua buka tuir suspeitu sira iha area Liquiça laran maibé sira halai ses ona hosi lokál krime mai tiha Dili, nune’e ho apoiu tracker GPS (Global Positioning System) ne’ebé iha, ekipa halo restreamentu no hatudu indisius forte pozisaun suspeitu sira-nia rezidénsia ne’ebé klaru no konsege asegura suspeitu nain 3 iha area Tasi-Tolu.
Suspeitu nain 3 ne’e ho identidade mak hanesan, MMH, hosi Iliomar, Munisípiu Lautem, ET hosi Lisa Pat, Munisípiu Ermera no AM hosi Leorema, Munisípiu Liquiça. Antes ne’e suspeitu AM rasik tama ona prizaun no foin sai iha tinan kotuk tanba komete kazu iha quarentena Tasi-Tolu.
Iha prosesu kapturasaun suspeitu sira konfesa no rekuñese aktu krime ne’ebé sira komete katak sira nain 4 mak autór ba kazu naok iha Liquiça no Dili nian no prontu koopera ho autoridade kriminál hodi halibur evidénsia nune’e bele entrega fali sasán sira ne’ebé sira naok, maibé sasán balu sei iha hela suspeitu ho naran SKT ne’ebé sai hanesan autór prinsipál iha Liquiça no halai ses ona ba munisipiu seluk.
Hafoin halo koordenasaun ho autoridade judisiaria kompetente oras ne’e daudaun Komandu PNTL hatun ona diretiva ba Komandante SIPN ho ekipa hodi intensifika buka tuir autór sira seluk ne’ebé envolve iha kazu refere.
Ekipa konjunta entrega ona suspeitu sira ba Departamentu Investigasaun Kriminál (SIK), Eskuadra PNTL Liquica Vila nian hodi halo prosesu investigasaun no detein durante 72h tuir lei ne’ebé iha, antes submete ba tribunál hodi tuir prosesu julgamentu. #AX
