SELEBRASAUN MISSA ORDENASAUN EPISKOPÁL DOM LEANDRO MARIA ALVES IHA BAUCAU

BAUCAU, 22 jullu 2023 – Ministru Interior (MI), Francisco da Costa Guterres, Ph.D, hamutuk ho Komandante Jeral PNTL Komisariu Jeral, Henrique da Costa, partisipa iha selebrasaun Missa Ordenasaun Episkopál Dom Leandro Maria Alves, ne’ebé ordenasaun hosi Sua Eminênsia Reverendissima Virgilio Cardeal do Carmo da Silva, SDB, iha Igreija Catedrál Dioseze Baucau.

Hafoin simu ordenasaun, Bispu Dioseze Baucau, Dom Leandro Maria Alves, kompromete atu sai símbolu unidade no sinodalidade iha Dioseze Baucau no Igreja Timor laran tomak.

“Ha’u prontu hatan Sim ba Na’I Maromak Nia bolu, no agora iha imi leet hakarak atu sai sinál unidade no sinodalidade,” Dom Leandro Maria Alves hateten iha diskurusu ordenasaun Epískopal ne’ebé realiza iha Igreja Katedral Santu António Baucau, Sesta (21/07/2023).

Nia dehan, to’o ona tempu atu lao sai ba buka bibi sira ne’ebé lakon no buka sira ne’ebé lao sala dalan. Buat ne’ebé importante liu maka hamutuk iha orasaun no konfia iha Maromak.

Entretantu Prezidente Repúblika (PR), José Ramos-Horta, hateten, Igreja Katólika mak kontribui iha tinan atus bá atus formasaun timor nia istória relijiaun omojénea, identidade, kultura, dignidade Timor-Leste nian iha mundu.

Iha biban ne’e, Xefi Estadu mos hato’o mensajen bá Bispu foun Dioseze Baucau, Dom Leandro Maria Alves ho sarani timoroan hotu iha Dioseze Baucau, atu hamutuk hametin misaun evanjelizasaun, kontínua hametin kultura no identidade nasionál, kontínua hametin rekonsiliasaun ho dame, fraternidade umana, igualdade jéneru, feto ho mane direitu hanesan, hadomi oan sira defisiénsia ho nesesidade espesiál, kontínua formasaun edukasaun formal, étika, ho umanista no kontínua formasaun iha siénsia.

Serimónia Ordenasaun Episkopál Dom Leandro Maria Alves hosi Eminênsia Reverendissima Virgilio Cardeal do Carmo da Silva, SDB ne’e hetan akompañamentu hosi Eminência Reverendissima Dom Norberto do Amaral, Bispu Dioseze ba Maliana no Prezidente Konferénsia Episkopál Timorenses(PCET-Sigla Portugés), S.E, Reverendissima Monsenhor Marco Sprizzi, Reprezentante Santa Sé, S.E, Reverendissima Dom Charles Gauci, Bispu Darwin Australia, S.E, Reverendissima Dom Dominikus Saku, Bispu Atambua, S.E, Reverendissima Dom Daniel Eugene Hurley, Bispu Emeritu Darwin Australia.

Paritispa iha seremonia ne’e envolve, membru Guvernu, Deputadu sira hosi Parlamentu Nasional, Korpu Diplomatiku, Veteranus sira, lider relijiozus, lider komunitaria no sarani sira husi munisípiu Baucau no-mos munisipiu balu tan. #Bui