Dili loron 4 fulan setembru 2023 (SRP)- Sekretáriu Estadu ba Protesaun Sivíl, Domingos Mariano Reis akompaña husi Diretór Jerál Administrasaun no Finansas Mariano de Araújo inklui Komisáriu Julio da Costa Hornai, Faustino da Costa, Henrique da Costa prezide seremónia Isar Bandeira Nasionál, iha resintu Vila-Verde.
Perante diskursu inspetór seremónia nia ne’e ezije funsionáriu sira tenke hatudu disiplina iha oras servisu, ba hirak ne’ebé la kumpri dever sira sei hetan infrasoens no sansoens ne’ebé regula iha estutu funsaun Públika iha ne’ebé sei aplika pena disiplinar sira hanesan Repriensaun eskrita (Xamada atensaun), multa suspensaun, inatividade no demisaun ne’ebé determina husi Komisaun Funsaun Públika.
Iha biban ne’e, orgaun superior Administrasaun Públika ne’e salienta katak “diretu iha mós dever bainhira saláriu tama tarde ita ezije maibé haluhan tiha dever hanesan funsionáriu públiku, mai tarde, semana ida tama dala rua, haluhan tiha ita-nia dever jerál no espesiál sira, Ita-nia dever hanesan servidór estadu no hanesan mós funsionariu públiku tenke kumpri, semana ida tenke servisu oras hatnulu (40), loron ida servisu oras ualu, loron-loron karik la prezente tenke justifika ba ita-nia superiór iérarkia liuhusi telefone, mensajen ho razaun ruma hanesan informasaun tenke informa antes, superiór iérarkia tenke kontrola funsionáriu sira iha oras servisu”.
Iha parte seluk, membru IX governu konstitusionál ne’e bolu atensaun ba Diresaun Nasionál Jestaun Patrimoniu no Arkivu tenke toma responsabilidade ba materiál limpeza sira no Autoridade Protesaun Sivíl mós hanesan nune’e sesta-sesta hotu-hotu, “hahú husi ha’u ba to’o sub-ordinadu sira halo limpeza iha ita-nia fatin servisu ba to’o iha liur. Husu mós ba estrutura tomak Prezidente Autoridade Protesaun Sivíl tenke mantein limpeza iha sesta-sesta, labele hatoman a’an ou abitua ho despaixu husi superiór iérarkia sira, laiha funsionáriu ida iha razaun katak nia la ba halo limpeza sekarik, iha favór fó naran mai ha’u, tantu husi funsionáriu ou kargus diresaun no xefia xefe sira, karik ida-ne’e akontese hatudu katak ita la kontribui ba governu no estadu ida-ne’e, hahú husi gabinete Ministru, Gabinete Sekretariu Estadu to’o diresoens tutelas atu kontribui ba ita-nia rain ne’ebé moos no saudavel atu nune’e Dili sai furak liután. uluk ema bolu Dili Bertais, ita rasik kaer hela kuda talin ita haree ita-nia rain foer hela ita la kohi halo limpeza.
Hanesan superiór iérarkia ninian husu ita hotu atu kontribui ho konsiénsia ba dezenvolvimentu, ita ko’alia dezenvolvimentu mais ita-nia rain foer hela, ema mai ema hamanasa, tanba ne’e husu para ita atu halo limpeza iha sesta-sesta”, Sekretáriu Estadu ba Protesaun Sivíl akresenta.
Entretantu Orgaun Superiór Administrasaun Públika ne’e enkoraja funsionáriu sira garante sustentabilidade ba iha dezenvolvimentu nasaun nian, labele ko’alia deit maibé tenke implementa, tenke halo asaun konkreta ho evidiénsia katak halo buat ruma ba nasaun ne’e, labele hein ema dudu husi kotuk maibé tenke iha konsiénsia pesoál.
Iha sikun seluk, Governante IX Governu konstitusionál ne’e bolu atensaun ba kargus diresaun no xefia sira tenke kontrola ida-idak nia funsionáriu, ba sira ne’ebé mak la kumpri regras no regalias husi funsaun públika hatudu katak jestór sira mak la kontrola no lakohi kontrola nia subordenariu sira hodi halo servisu.
“Ha’u rasik sei kontrola ita bo’ot sira surpreza ba ida-idak nia fatin no diresoens tutela sira no ha’u rasik sei husu kada diresaun ida-idak kona-ba ita bo’ot sira-nia funsionáriu, karik la prezente nia ba ne’ebé, justifikasaun la klaru sei tau falta, ita bo’ot servisu laos ba Ministru ou servisu ba sekretariu estadu maibé ita hotu servisu ba nasaun no estadu ida-nee, tanba ne’e tenke servisu, estadu selu para hodi halo servisu ba estadu no rai rai ida-nee. Bainhira falta bebeik mak sei halo demisaun.
Demisaun ne’e katak hakotu individu ida ho instituisaun estadu, ita bo’ot la merese ona sai servidór estadu, suspensaun katak suspende ita bo’ot inaktividade iha durasaun tempu ne’ebé determina ita bo’ot laiha diretu atu hetan saláriu tanba ita bo’ot la merese sai servidór estadu, ita bo’ot faltozu kuandu suspende tenke suspende. Hanesan servidór estadu tenke servi povu labele abitua ho kolega, família partidu, ko’alia partidu ne’e, so ha’u ho Ministru deit hahú husi Asesór sira tun mai ne’e ita bo’ot sira ko’alia tékniku”, hakotu Sekretáriu Estadu Protesaun Sivíl.#
Foto : Liza
Editora : Fatinha
