Dili, 20 dezembru 2023 (SRP) – Ministru Interior, Francisco da Costa Guterres, Ph.D, hamutuk ho Ministru Juventude, Desportu no Arte Kultura, Nelyo Isaac Sarmento, akompaña Prezidente Repúblika (PR), Jose Ramos-Horta, hodi halo diálogu ho lider Grupu Arte Marsiais (GAM) no Grupu Arte Rituais (GAR ), iha Palásiu Guvernu Aitarak-Laran Dili.
Objetivu hosi diálogu ida-ne’e atu konvida komponente hotu-hotu inklui lider Grupu Artes Marsiais, Grupu Arte Rituais, hodi buka dalan reintegra sira iha sosiedade oinsá maka rekunese sira-nia ezisténsia ho valores ne’ebé sira defende inklui hodi regula Arte Marsiais no Rituais sai diak liután.
“Agradese ba ita bo’ot sira ne’ebé ohin mai iha ne’e hodi bele kontrobui ba rai ida-ne’e. Ita-nia parte tenta atu kordena hamutuk hodi asegura estabilidade no kria paz iha komunidade nia le’et. Tanba komunidade maka ita-nia inan-aman, maun-alin sira de’it no wainhira mosu konflitu feto no labarik sira maka sai vitima ba violensia ne’ebé akontese”, esplika Ministru Francisco, iha Palásiu Prezidente Aitarak-Laran. kuarta (20/12/2023).
Iha biban ne’e, Ministru Francisco husu ba lider organizasaun sira atu kontrola sira-nia membrus no-mós rezolve sira-nia problema ne’ebé mak interna hodi labele kahur problema individu ba organizasaun nian.
“Hau konkorda katak labele kahur problema individu tama iha organizasaun tán ne’e membru sira mós labele lori organizasaun tama iha problema individu hodi kria konflitu. Maibé problema ne’ebé mosu alastra hosi solidariedade entre ema ida rua nian. Tanba ne’e husu atu orienta no kontrola membru sira nune’e bele hapara violénsia no kria paz hodi kontribui ba estabilidade iha rai ida-ne’e”, afirma.
Ministru Interior, Francisco da Costa Guterres akompaña Prezidente Repúblika (PR), Jose Ramos-Horta, halo diálogu ho lider Grupu Arte Marsiais (GAM) no Grupu Arte Rituais.
Nia salienta liután katak, Governu sei kontinua halo sensibilizasaun liuhosi Diresaun Nasionál Prevensaun Konflitu Komunitária-DNPKK, ne’ebé tutela iha Ministériu Interior no servisu hamutuk ho Prezidénsia Repúblika nian liuhosi Servisu Asuntu Polítiku no Fraternidade Umana.
“Agora daudaun ami hari Komisaun Edukasaun Sivika ne’ebe sei servisu ho Prezidensia Republika nian halo dialogu ho organizasaun sira hodi informa ba sira, saida mak sira presiza halo, nune’e bele kria kondisaun ba joven sira hodi envolve an iha atividade produtivu sira”, tenik tan.
Diálogu ne’ebé ho tema “Dalan unidade hodi garante prosesu dezenvolvimentu nasional”, ne’e hetan prezensa hosi Komandante Komandu Operasaun PNTL Superintendente Xefi Polísia, José Soares, Komandante Komandu Administrasaun PNTL, Superintendente Xefi Polísia, Natercia Martins, Diretora Nasionál Prevensaun Konflitu Komunitaria, Lidia Lopes de Carvalho, reprezentante komandu F-FDTL no PNTL, líder hosi GAM no GAR no-mós Komisaun Reguladora Arte Marsiais (KRAM). # (Oscar/Fatinha/AX).
