Atabae, 16 novembru 2023 (SRP) – Ministru Interior, Francisco da Costa Guterres, Ph.D, hamutuk ho Sekretariu Estadu Protesaun Sivíl, Domingos Mariano Reis, ofisialmente halo abertura formasaun kona-ba prevensaun konflitu ba pontu fokal no mediador Diresaun Nasional Prevensaun Konflitu Komunitáriu (DNPKK), husi munisípiu sanulu resin rua inklui Rejiaun Administrativa Espesiál Oekuse Ambeno ( RAEOA) ne’ebe hala’o iha Postu administrativu Atabae, Munisipiu Bobonaro.
Iha abertura Ministru Interior, Francisco Guterres, hateten formasaun ida ne’e hodi aselera progresu prevensaun konflitu, har’i paz no estabilidade nasional iha Timor laran tomak.
“Kursu ou formasaun ida-nee importante atu fó hela bukae ba ita boot sira nudar mediador no pontu fokal hodi hadi’a konesimentu klean no ajuda estadu ida-nee, atu harii paz no estabilidade iha ita-nia rain”, esplika Ministru Francisco, iha Sentru Treinamentu Primeiru Sarjentu Aquelis da Silva Rairobo, kinta feira ne’e (16/11/2023).
Nia dehan, partisipante ba etapa ida ne’e mesak foinsa’e timoroan hamutuk ema nain 269 kompostu hosi feto 96 no mane 173 sei aprende difinisaun sira kona-ba prevensaun konflitu nian hodi servisu hamutuk ho Autoridade lokal sira liliu lideransa komunitaria, lider relijioju, veteranus, lia nain no-mos Ofisial Polisia Komunitaria sira.
“Imi sira hamriik iha ne’e sei ba iha munisipiu, entaun imi sira ne’e ita bolu elementus prinsipais ba ajuda komunidade no ajuda estadu hametin paz, imi-nia knaar nee laos buat halimar ida, imi nee ema importante estadu nian para koloka imi iha ne’eba para halao knaar iha baze ajuda estadu, imi iha knaar lubun boot ida imi sei halo iha ne’eba”, fundamenta.
Ezekutivu ne’e salienta, servisu iha area prevensaun konflitu ne’e laos buat fasil, tanba ne’e maka persija iha formasaun atu oinsa bele aprixima ho komunidade no uza termus ida ne’ebe atu uza ba mediasaun iha nivel Munisipal, Postu to’o Suku sira hotu iha teritoriu nasional.
“Primeiru imi ba iha ne’eba hodi detekta pontus situasaun, katak wainhira haree iha problema ruma ne’ebé afeita estadu ida-nee, imi bele fó imi-nia konhesimentu no buka atu prevene. Imi mós bele halo mediasaun, iha problemas ajuda, bolu ema halo diálogu, atu rezolve, imi labele sente aan katak imi ne’e la vale, imi tenke tau imi-nia an hanesan elementus importante atu ajuda estadu ida-ne’e harii paz no estabilidade atu bele dezenvolve rai ida-ne’e”, dehan tan.
Nia hatutan, mediador hirak ne’e, sei sai hanesan parte integrante ida husi DNPKK atu habelar Diresaun ne’e nia knar no responsabilidade iha baze, hanesan Munisipiu, Postu Administravu, Suku, Aldeia, liu-liu iha bairu ne’ebe sira hela ba.
“Knar importante seluk ne’ebe atu halo maka atu identifika sinais konflitu sira ne’ebe akontese no fahe informasaun ba komunidade sira kona-ba servisu rezolusaun konflitu nian nune’e bele ajuda kria estabilidade. Tanba laos Polisia deit maka atu fo seguransa, maibe estabilidade ne’e sai responsabilidade ema hotu liu-liu hirak ne’ebe maka tutela iha Ministeriu Inteior nia okos”, tenik tan.
Iha okajiaun ne’e Ministru husu ba formandu sira atu prepara mental hodi simu materia sira hosi formador sira ne’ebe sei fo hosi PNTL no-mos membru Guvernu sira.
“Ministru lubuk boot ida sei mai iha ne’e atu koalia kona-ba programas governu hodi dezenvolve rai ida-nee nian para imi entende diak, liu-liu iha area dezenvolvimentu area rurais, empregu, kooperativa, agrikultura no-mos area minerais nian. Ba material sei hala’o durante semana tolu nia laran ne’e importante tebes ba imi-nia servisu tanba imi sei entende kona-ba konstituisaun no kestoens legais sira nunee imi bele ajuda autoridade lokál, ajuda polísia atu bele oinsá rezolve krime sira ne’e iha terenu. tanba ne’e husu ba imi tuir ho didiak, haree ba oin, haree ba estadu, haree ba nasaun para dezenvolve rai ida-nee, ba oin”, subliña.
Iha oportunidade ida-nee Ministru Interior hato’o agradesementu wain ba Sekretariu Estadu Protesaun Sivíl ne’ebé orienta Seguransa Sivil no Bombeiros hodi fo apoiu ba Komisaun Organizadora, Komandu Jerál PNTL, Komandante Sentru Formasaun, liuliu instrutór sira ne’ebe fó formasaun no-mos Diresaun Jeral Ministériu Interior ninian.
Hola parte iha seremonia ne’e envolve,Diretor Jeral Administrasaun Finansas, Mariano de Araujo, Komandante Komandu Pesoál no Formasaun, Superintendente Xefi Polísia, Arquimino Ramos, Komandante UPF interinu, Superintendente Asistente Polisia Carlos Moniz Maia, Diretora Nasional DNPKK, Lidia de Carvalho, Segundu Komandante Sentru Formasaun PNTL, Emilio do Santos, lider komunitaria, lider relijioju, veteran, Komandante Eskuadra Atabae no-mos komunidade sira ne’ebe hela besik iha area refere. #(Oscar/Fatinha/AX).
