Dili, 15 maiu 2024 (SRP) – Ministru Interiór (MI), Francisco da Costa Guterres, Ph.D, partisipa, iha serimónia abertura ba Feira Promove Produtu Nasionais no Lokál hodi komemora loron restaurasaun independénsia Timor-Leste nian ba dala 22 ne’ebé mak monu iha loron 20 Maiu.
Feira Promove Produtu Nasionais ne’e ho Tema “HAMUTUK HO DAME PROMOVE PRODUTU NASIONAIS” ne’ebé organiza husi IX Governu Konstitusionál liu husi Ministériu Administrasaun Estatál servisu hamutuk ho Ministériu Komersiu no Industria no sei hala’o durante loron 6 hahú husi 15 to’o 20 Maiu 2024 iha Porto Dili.
Primeiru-Ministru (PM), Kayrala Xanana Gusmão, iha abertura hateten eventu ida-ne’e hanesan parte ida hodi motiva komunidade iha sidade Díli no mós halao promosaun ba produtus lokál ne’ebé mak povu agrikultores produs rasik.
“Feira ida-ne’e hanesan insiativa ida hodi fó motivasaun atu haree ba dezenvolvimentu iha rai laran. Hau hatene katak emprezas lokais hamutuk ho produtu sira ne’e atu bele motiva tán sira seluk hodi bele produs barak liután tanba empregu mak ida-ne’e hodi osan bele tama selae osan ba hotu rai liur”, esplika PM Xanana, iha Portu Dili, kinta kalan ne’e.
Nia dehan, polítika IX Guvernu nian tenke produs buat barak hodi hadia produtu rai laran no insentiva produsaun lokál ne’ebé mak ita-nia povu produs tanba maioria produtu ne’ebé iha rai laran sosa hosi rai liur.
“Buat barak ita importa no sosa hosi liur, IX Guvernu sente katak Timor-Leste bele produs buat balu. Ita hahú dadaun ona nune’e atu fó hatene ba hotu-hotu katak ita iha potensia wainhira ita servisu ho laran sei sai baze ba osan atu mai ita-nia liman, selae osan ne’ebé hasai hosi fundu minarai sei ba hotu rai liur”, Xanana fó hanoin.
PM Xanana garante katak Guvernu sei halo di’ak liután hodi tau matan ba produtus lokál nune’e Timor-Leste mós bele transforma produtus industriais hodi bele halao exportasaun ba rai liur.
“Ita mós sei aumenta nafatin produsaun iha setór agrikultura nian tanba ne’e hau fiar katak iha tinan lima nia laran ita lao hamutuk ho hanoin ida de’it maka ita bele muda tiha situasaun vida sosiál hodi hadia tiha problema ekonomia”, fundamenta.
Xefi Guvernu ne’e salienta, wainhira agrikultór sira bele produz rasik maka automatikamente osan sei tama no lapresija tán sosa hosi rai liur tanba bele halo mesak ona. #SRP
