Atabae, 13 dezembru 2023 (SRP) – Sekretáriu Estadu Komunikasaun Sosiál, Expedito Loro Dias Ximenes, halo palestra ba mediador no no pontu vokal ba prevensaun konflitu sira ne’ebe tuir formasaun hodi haklean liutan sira nia koñesementu kona-ba papel media iha seguransa nasional.
“Ohin ha’u mai mai iha ne’e hetan konvite hosi Ministeriu Interior hodi koalia kona-ba papel midia iha kontekstu seguransa nasional nian. Entaun iha ne’e ita bot sira nudar mediador presija tebes atu entende katak papel mídia mak atu divulga informasaun ne’ebé saudavél hodi konsiénsializa komunidade hodi hadook aan hosi konflitu”, Esplika Expedito Dias Ximenes, perante sai oradór ba formandu sira Sentru Treinamentu 1° Sargento Aquelis da Silva-Rairobo, Postu-Administrativu Atabae, Munisípiu Bobonaro.
Tuir nia, papél midia, tantu privadu no públiku, mak informa, eduka no diverte maibé mós atu influénsia no sai ajente kontrolu sosial ne’ebé ninia papel importante mos iha prosesu konstrusaun Estadu no hametin paz no estabilidade nasaun nian.
“Hau lori media imprime no plataforma online mai iha ne’e atu fo sai no divulga atividade sira iha fatin ida ne’e hodi hatudu ba joven sira seluk katak joven ohin loron prontu hakarak prevene konflitu iha ita nia rai”, dehan Expedito.
Formandu sira hato’o hela perguntas balun ba oradór sira iha Rairobo
Governante ne’e hateten, maski ita nia nasaun adota ona sistema demokrasia maibe nia parte sei kontinua husu ba Parlamentu Nasional atu halo lalais lei “cyber crime” hodi regula krime burla informatika ne’ebe iha relasaun ho teknolojia hodi kondena no kriminaliza sidadaun sira ne’ebe uza identidade falsu hodi fahe informasaun lalos.
“Ita Sei halo lei sibernetika hodi regula konaba hoax fo mos sansaun ba ema ne’ebe fahe informasaun falsu tanba liberdade no direitu ne’e ema hotu tenke respeita”, salienta.
Liga ba krime sibernetiku ne’e oi-oin deit no luan tebes, ninia fronteira ne’e laiha tanba ne’e wainhira lei kona-ba cyber crime ne’e iha ona maka sei fasilita mos informasaun ba ajensia sira no sei la bazeia deit ba kodigu penal.
Entretantu Timor-Leste seidauk iha lei espesífiku iha área ida-ne’e. Iha Kódigu Penál Timor-Leste, ko’alia oituan de’it iha artigu 268.0 kona-ba Burla informátika no artigu 176.0 kona-ba pornografia infantíl. Timor-Leste seidauk ratifika konvensaun Budapest kona ba krime sibernétika. (Bui/Oscar/AX)
