DILI, 31 agostu 2023 (SRP) – Ministru Interior, Francisco da Costa Guterres, Ph.D, halo enkontru ho Embaixadór Nova-Zelándia Philip Hewitt, hodi diskute kona-ba servisu hamutuk ho Ministériu Interiór hodi haree ba área seguransa nian liu-liu dezenvolvimentu PNTL (Polísia Nasionál Timór-Leste) iha tinan lima nia laran.
“Objetivu husi enkontru ida ohin ko’alia ho Ministru atu kria relasaun servisu entre nasaun rua Nova-Zelandia no Timor-Leste. Entaun iha oportunidade ne’e ami introduz programa Polisiamentu Komunitaria (POLKOM) ne’ebé maka Nova-Zelándia fó ona iha tinan ne’e no haree mos ba prioridade ne’ebé maka importante iha Polísia Komunitaria nia laran”, dehan embaixadór Philip Hewit, hafoin remata enkontru ne’e iha Ministériu Interiór, Vila-Verde kinta ne’e.
Diplomata ne’e hatutan, Guvernu Nova-Zelándia iha komitmentu boot ba setór seguransa iha Timór-Leste, hodi kontinua apoiu Polísia Komunitaria nu’udar medida preventiva ida nomós hakbesik a’an iha komunidade sira-nia leet.
Iha okajiaun-ne’e, Ministru Interiór, mós agradese ba tulun ne’ebé durante ne’e Timór-Leste hetan husi Nova-Zelándia tanba kontinua apoiu Guvernu Timór-Leste iha setór seguransa nian.
“Lori Guvernu nia naran hakarak hato’o agradesimentu ba Guvernu Nova-Zelandia liuhusi Embaixadór Philip iha Timor-Leste ne’ebé esforsu nafatin hodi apoiu ita iha area segurasa nian. Ita hatene katak durante tinan barak sira nafatin dezenvolve programa kooperasaun ne’ebé foka liubá Polisiamentu Komunitaria”, afirma Ministru Francisco.
Governante ne’e hatutan sei kontinua servisu hamutuk ho parseria dezenvolvimentu sira hodi hadia setór seguransa iha Timór-Leste liuhosi konseitu estratejika no tatika POLKOM nian, ho objetivu atu haforsa polisia ho komunidade iha espiritu parseria ne’ebe metin no forte, liu-liu iha área prevensaun ba konflitu. #
Autor : Bui
Editor : Fatinha
Fotos : AX
