𝐔𝐍 𝐖𝐎𝐌𝐀𝐍 𝐀𝐏𝐎𝐈𝐔 𝐆𝐔𝐕𝐄𝐑𝐍𝐔 𝐇𝐎𝐃𝐈 𝐈𝐌𝐏𝐋𝐄𝐌𝐄𝐍𝐓𝐀 𝐄𝐃𝐔𝐊𝐀𝐒𝐀𝐔𝐍 𝐒𝐈𝐕𝐈𝐊𝐀 𝐈𝐇𝐀 𝐓𝐋

Díli, 23 janeiru 2025 (SRP) – Ministru Interior, Francisco da Costa Guterres, Ph.D, hetan vizita kortezia husi Amy Nishtha Satyam nudar Xefi UN Woman iha Timor-Leste ho ekipa hodi ko’alia kona-ba atu hametin kapasidade institusional liu hosi programa importante tolu mak hanesan, PAN 1325 Feto Pas no Seguransa faze daruak nian, mediasaun no-mos dezenvolve no implementa Programa Edukasaun Sivika iha Timor-Leste.

Iha enkontru ne’e, Xefi UN WOMEN kongratula no lori ONU no Feto Timor-Leste nia naran hato’o saudasaun tinan foun ba Ministru Interior, nune’e iha tinan 2025 lori susesu, prosperidade no progresu signifikativu ba Ministériu Interiór no povu Timor-Leste.

“Ohin ami kontente tebes halo enkontru ho Ministru Interior hodi kongratula nia hanoin didi’ak kona-ba pasu boot tuir mai hodi hametin kapasidade institusional atu dezenvolve no implementa Programa Edukasaun Sivika, ne’ebé ha’u hanoin horiseik diskute ona iha Konsellu Ministrus. Entaun UN Women nafatin iha komitmentu hodi ajuda Guvernu Timor-Leste liu hosi implementasaun no monitorizasaun ne’ebé efetivu ba PAN foun 1325, no-mos asuntu seluk tan kona-ba Migrasaun no Tráfiku Humanu inklui edukasaun sivika, ne’ebé halibur hamutuk feto sira-nia partisipasaun no lideransa iha setór hotu-hotu liu-liu haforsa instituisaun governu no eduka sosiedade sira ba mudansa ne’ebé pozitivu”, dehan Xefi UN Women, Nishtha Satyam, hafoin remata enkontru ne’e iha Ministeriu Interior, Vila-Verde, kinta (23/01/2025).

Nia dehan, UN Woman nafatin apoiu Guvernu Timor-Leste tanba Ministériu Interior nudar instituisaun prinsipal hodi asegura seguransa no protesaun públiku iha Timor-Leste.

“Iha tinan ida-ne’e, UN Women nafatin iha kompromisu kle’an hodi apoia Governu Timor-Leste no promove ajenda Feto Paz no Seguransa, nomós prioridade sira seluk ne’ebé aliña ho enkuadramentu nasionál no globál ba dezenvolvimentu sustentável sira hanesan harii dame, no igualdade jéneru. Entertantu espesifikamente ami apoiu Ministériu Interiór ne’e hodi promove no implementa ajenda nasionál Feto Paz no Seguransa nian, inklui inisiativa sira hodi hasa’e partisipasaun feto iha lideransa, harii dame no seguransa, dezenvolve Programa Edukasaun Sívika iha aliñamentu ho prioridade dezenvolvimentu nasionál sira”, salienta.

Xefi UN Woman ne’e mos hato’o nia apresiasaun maka’as ba IX Governu Konstitusional Timor-Leste liuhusi lideransa Ministeriu Interior ho komisaun elaborador nudar parseria hodi kontinua haburas dezenvolvimentu responsivel ba jéneru. #Bui