𝐌𝐈𝐍𝐈𝐒𝐓𝐑𝐔 𝐈𝐍𝐓𝐄𝐑𝐈𝐎𝐑 𝐀𝐏𝐑𝐄𝐒𝐈𝐀 𝐒𝐄𝐑𝐕𝐈𝐒𝐔 𝐏𝐍𝐓𝐋

𝐃𝐢𝐥𝐢, 𝟐𝟕 𝐣𝐚𝐧𝐞𝐢𝐫𝐮 𝟐𝟎𝟐𝟓 (𝐒𝐑𝐏𝐌-Ministru Interior, Francisco da Costa Guterres,Ph.D, hato’o apresiasaun ne’e iha abertura ba Workshop Avaliasaun tinan-2024, ba programa prioridade lima husi servisu PNTL nian, ne’ebé sai hanesan prioridade ba mandatu Komandante Jerál PNTL no Segundu Komandante PNTL ba períodu tinan 2023-2026 ne’ebé hala’o iha sala reuniaun Suai Room, Timor Plaza, Segunda-feira ne’e.

Eventu ida-ne’e, ho objetivu atu halo avaliasaun ba servisu PNTL nian durante iha tinan 2024, no saida mak presiza hadia no aumenta iha tinan foun 2025.

Iha diskursu, Ministru Interior, Francisco da Costa Guterres,Ph.D, husu ba PNTL hotu, katak durante iha diskusaun ne’e tenki onestu no ko’alia ba malu, tanba sei iha tan faze ida, ita rezolve tiha problema ida ne’ebé maka sei kait hela ba kotuk nian, ita no imi hotu nia apoiu ba iha kestoens aprovasoens, husu ba ofisiais superior sira nia kompriensaun balun dehan ami la kona ita, haree lai sira kraik, tanba ita bo’ot sira maka komandante, tenke tau matan ba imi nia ema sira ne’ebé loron-loron imi manda, imi haruka sira halai, ida ne’e maka imi tenke haree, rezolve sira nia problema uluk, sira hotu ona, sira los ona, depois maka ita haree fali imi sira ne’e, hatudu ita nia karakter lideransa ne’e tenke nune’e, laos de’it ba ita nia-an, haree uluk ba sira ne’ebé lor-loron ha’u duni sira, ha’u haruka sira halai ba mai hodi ba halo sevisu, ha’u husu ita bo’ot sira nia kolaborasaun no komprensaun, importante ita rezolve tiha problema promosaun hirak ne’e, para ba oin ne’e promosaun la’o normal ona, lao tuir regras ne’ebé iha para labele probletizmu, amigos, tau dook tiha ida ne’e.

“Hato’o Parabéns ba Polisia PNTL bele realiza Avaliasaun servisu iha PNTL nian iha tinan ida ne’e, nune’e bele ajuda Governu hodi bele rezolve no solusiona problema sira iha Polisia nia laran” dehan Ministru Francisco.

“Tanba bainhira ita lahetene ita nia frakeza, ita labele buka solusaun ne’ebé mak di’ak liu, wainhira ita halo Avaliasaun ho diak mak sei identifika problema sira ne’ebé mak ita hasoru durante ne’e. Iha faze ida-ne’e, tenke tau ema iha sentru, uza teknolojia atu bele ajuda ema no rezolve problema ho di’ak”, tenik tan.

Governante ne’e salienta, sei harii komisaun ba Avaliasaun ba iha Instituisaun Seguransa nian, ba iha funsionamentu Institutuisionál.

“Ita hakarak atu konsolida instituisaun ida-ne’e, atu metin liu tan, tanba buat ne’ebé ita hala’o mai ona, ita bele dehan hanesan ne’e, 2027 faze foun ida ba PNTL to’o ona reforma ida todan, reforma ida ne’ebé maka lori problema balun, dezafia ita bo’ot sira konsege tama liu ho di’ak, tama reforma 2007, 2008, 2009, 2010 mai krizi ita bolu krizi instituisaun krizi politika, ne’ebé mai iha 2007 to’o agora la’o ho di’ak, apezar iha problemas ida rua maioria imi hamrik metin hodi la’o ho di’ak”, subliña.

Ezekutivu ne’e akresenta, esensial tebes servisu hamutuk tanba instituisaun ida-ne’e komesa metin.

“Presiza konsolida tiha tanba nia fundasaun seidauk metin tanba ne’e ami halo analiza halo didiak kona-ba instituisaun ida-ne’e, ita presiza tan hametin fundasaun para depois ita husik nia la’o ona para se de’it maka mai kaer ka ukun mós, instituisaun ida ne’e sei la nakdoko, tanba-ne’e maka ita presiza hametin ida ne’e”, afirma.

“Faze ida-ne’e, ba oin konsolidasaun istituisaun konstitusional ba seguransa ninian, tinan ida ho balun ita konsege hatudu ona, la’o mezmu iha problema lubun bo’ot ida, ita konsege lao, 2024 ita bo’ot sira hatudu ita bo’ot sira nia relatóriu di’ak tebes”, dehan MI.

“Vizita Amu Papa, ema sei ko’alia to’o agora, susesu ida ne’ebé ema la espera, ita bo’ot sira hatudu kuandu imi hamrik metin, tuur metin, hanoin didi’ak ba rai ida ne’e, imi sei bele halo buat ruma, maibé ita komesa tau tiha interese ba oin sei iha problema, ne’e maka instituisaun sei iha problema kuandu ita mai dehan lae, interese privadi tau tiha ba kotuk, haree ba povu ida ne’e, povu ne’e se, povu ne’e maka ita nia maun alin sira, servi sira ho di’ak, tane sira atu nune’e sira bele dezenvolve sira nia-an hodi hetan rendementu ruma, hadia sira nia vida iha rai ida ne’e”.

“Ita tama iha faze foun ida, uluk atu rezolve iha tempu ne’eba ida-idak nia hanoin, ida-idak nia prioridade, ita la konsege rezolve, mais agora lae, tenke rezolve ida-ne’e, tau ba normal para la’o ho di’ak, polisia ne’e tenke, labele sadere ba politiku se de’it maka mai iha governu, ita bo’ot sira metin hela iha fatin, ne’e para hodi bele atende nesesidade estadu ida-ne’e”,

“Ita boot sira lembra iha 2023 hahu kedan ho buat ida divinkula iha Palasiu Governo, laiha ema ida mai manda arbiru, kontribui ba iha regras no orden mai husi nia superior sira, komandu ida deit, lalikan haree komandu ne’e ida deit, komandante fo orden hotu tenke tuir, ida-ne’e maka importante, ne’e faze ida konsilida instituisaun, ida ne’e se de’it mak ba orden tenke ezekuta, loyal nafatin ba instituisaun ida-ne’e, ba servi povu ida ne’e, hau husu ba ita boot sira, ita diskute hamutuk onestu, fo sai ba malu problema hirak ne’e tenke esplika no ko’alia ba malu, depois ita buka solusaun ba malu, rekuiñese ita hamutuk sai forsa ida ba governu, para governu bele buka solusoens, problema saida de’it maka ita bo’ot sira enfrenta”. hakotu.