𝐌𝐈 𝐅𝐎 𝐏𝐎𝐒𝐄 𝐁𝐀 𝐊𝐎𝐌𝐈𝐒𝐀𝐑𝐈𝐔 𝐀𝐒𝐈𝐒𝐓𝐄𝐍𝐓𝐄 𝐉𝐎𝐑𝐆𝐄 𝐌𝐎𝐍𝐓𝐄𝐈𝐑𝐎 𝐍𝐔𝐃𝐀𝐑 𝐃𝐈𝐑𝐄𝐓𝐎𝐑 𝐄𝐙𝐄𝐊𝐔𝐓𝐈𝐕𝐔 𝐒𝐄𝐑𝐕𝐈𝐒𝐔 𝐌𝐈𝐆𝐑𝐀𝐒𝐀𝐔𝐍 𝐅𝐎𝐔𝐍

𝐃𝐢𝐥𝐢, 𝟎𝟖 𝐦𝐚𝐢𝐮 𝟐𝟎𝟐𝟔 (𝐒𝐑𝐏) – Ministru Interior (MI), Francisco da Costa Guterres, Ph.D, ofisalmente fó posse ba Komisáriu Asistente Polísia Jorge Monteiro, hodi kaer kargu nudar Diretór Ezekutivu Servisu Migrasaun ne’ebe tutela iha Ministeriu Interior.

Tuir rezolusaun Guvernu ne’ebé aprova, Komisáriu Asistente Jorge Monteiro, nomeia iha rejime komisaun servisu ba kargu Diretór Ezekutivu Servisu Migrasaun, ba períodu tinan tolu, hafoin halo ezonerasaun ba Komisária Asistente Polísia Natércia Eufrásia Soares Martins hosi kargu refere, tanba nia hetan konfiansa Governu atu assume funsaun foun nu’udar Segundu Komandante-Jerál PNTL.

Ministru Interior, Francisco da Costa Guterres, iha ninia diskursu enkoraja funsionariu sira atu halao servisu ho responsablidade hodi servisu ho kualidade.

“Ha’u husu ba funsionáriu Servisu Migrasaun atu servisu ho seriadase, servisu ho profisionál no disiplina, tuir ida-idak nia knaar, hala’o servisu ne’e tenke ho di’ak no fó apoiu tomak ba kualkèr desizaun, situasaun saída de’it maka ezekutivu orienta”, esplika Ministru Francisco iha salaun enkontru DNSPP Matadoru, Sexta, (08/05/2026).

Governante ne’e husu ba funsionáriu hotu atu koopera hamutuk hodi asegura funsionamentu makina estadu nian lao ho diak.

“Ita boot sira iha migrasaun ne’e hanesan makina importante ida, mákina ne’e tenke funsiona ho di’ak, kuandu mákina ne’e kois bosok maka servisu sei lá funsiona ho di’ak, maibé kuandu imi aperta metin hotu, mákina sira funsiona ona hotu ho di’ak, ha’u garantia katak, makina ne’e sei funsiona ho dj’ak tebes”, alerta.

Iha fatin hanesan Komisáriu Komisaun Funsaun Publika ba Asuntu Planeamentu Forsa Traballu, José Telo Soares Cristovão, ne’ebe sai sasin iha serimonia tomada de pose ne’e hateten, Servisu Migrasaun assume papel importante iha liña fronteira nasaun nian.

“Servisu Migrasaun nu’udar servisu públiku ne’ebé asume papél fundamentál tebetebes iha dezenvolvimentu Governu Timor-Leste nian, ne’ebé maka asegura kontrola ba ema estranjeiru sira ne’ebe tama no sai hosi teritoriu nasional”, salienta.

Entertantu Diretór Ezekitivu Servisu Migrasaun Komisáriu Assistente, Jorge Amaro da Costa, agradese ba Guvernu neébe fo ona oportunidade hodi lidera Servisu Migrasaun Timor-Leste.

“Pessoalmente, iha oportunidade ida ne’e, hau hakarak hato’o hau nia obrigado no agradesimentu ba IX Governu Konstitusional no espesialmente ba Ministru Interior ba Fiar no konfiansa vinculativu, ne’ebe depozita mai hau hodi lidera, superviziona, kontrola no responsabiliza Servisu Migrasaun Timor-Leste”, haktuir Diretor Ezekutivu foun ne’e.

Komandante Jorge Monteiro realsa, sei kaer metin konfiansa ne’ebe iha tanba nia respeita tebes eroi no mártires sira nia luta ne’ebe sakrifika an ba prosesu liberasaun Nasional, hodi ohin loron Timor sai nasaun ida livre, independente no soberanu.

“Nu’udar timoroan, nu’udar juventude patriota, nu’udar jerasaun patriota, no mós nu’udar pesoál PNTL, ha’u kompromete ba ha’u nia-an katak, fiar, konfiansa no mós nomeasaun ida ne’e, oportunidade hodi utiliza atu bele alkansa ha’u nia interese pesoál no família. Maibé nu’udar responsabilidade, hodi transforma mehi hosi ema rihun ba rihun ne’ebé sakrifika sira nian-an tomak, iha prosesu luta naruk ba libertasaun nasionál, hodi sai realidade tuir ha’u nia kbiit, forsa no posibilidade ne’ebé iha”, Nia hakotu. #AX