Laos, 11 agostu 2023 (SRP) – Ho konvite husi Ministériu Seguransa Publika Laos PDR, Ministru Interior (MI), Francisco da Costa Guterres, Ph.D, partisipa iha Sorumutuk Ministeriál ASEAN nian ba da-ualu (sigla inglés; AMMD- ASEAN Ministeriál Meeting on Drug Matters), hodi koalia kona-ba kombate droga ilisitu nian ne’ebé hala’o iha Vientiane, Laos PDR.
Enkontru ne’ebe sei halao durante loron rua nia laran ne’e hahú iha loron 10-11 agostu ne’e inisiativa ida husi ASEAN atu oinsa nasaun membru inklui Timor-Leste nu’udar observadór hodi servisu hamutuk hasoru droga ilisitu sira iha rejiaun ne’e nune’e bele reforsa kompromisu atu realiza ASEAN ida-ne’ebé livre husi droga.
Iha sorumutuk ne’e ko’alia kona-ba progresu implementasaun Planu Servisu ASEAN nian kona-ba seguransa kontra droga ilisitu no-mós importánsia atu rezolve impaktu husi dezafiu sira ne’ebé mosu iha rejiaun ne’e.
Partisipa iha Sorumutuk Ministeriál ASEAN nian ba dala 8 ne’e envolve Sekretáriu-Jerál ASEAN nian Dr. Kao Kim Hourn, Vise-Primeiru-Ministru no Ministru Seguransa Publika Laos-PDR Pol Gen Vilay Lakhamphong, enkuantu delegasaun Timor-Leste ne’ebé halo akompañamentu ba Ministru Interior maka Komandante Jerál PNTL, Komisáriu Jerál Henrique da Costa, Xefi Departamentu Investigasaun Kriminál (DIK), Superintendente Polisia João dos Reis Belo no-mós Diretóra Jerál Servisu Migrasaun, Inspetora Xefi Polísia Adelaide da Rosa inklui Embaixadora Timor-Leste ba Laos, Maria Renata Caldas de Jesus. #AX
