Díli, 28 jullu 2023 (SRP) – Ministru Interior, Francisco da Costa Guterres, Ph.D, akompaña hosi Diretór Nasionál Prevensaun Konflitu Komunitáriu (DNPKK), António Viegas, simu audiénsia hosi ekipa organizasaun G7+ hodi ko’alia kona-ba kooperasaun servisu hamutuk parte rua nian iha área prevensaun konflitu liu-liu atu promove dame liuhusi atividade diálogu no rekonsiliasaun iha komunidade sira iha territóriu timor laran tomak.
“Ita hotu hatene katak G7+, hanesan organizaun Internasionál ne’ebé iha esperiensia barak ajuda nasaun barak hodi rezolve sira nia problema ho nune’e ita mós husu ajuda husi sira hodi bele ajuda ita-nia Governu. Entaun ohin ami koalia ona oinsá atu selebra akordu ida nune’e bele ajuda Diresaun Nasionál Prevensaun Konflitu no G7+ prontu hela atu apoiu Ministériu Interior hodi hahú ho planu boot ida ho Edukasaun Sivika, Prevensaun, Mediasaun no halo Rezolusaun ba konflitu” esplika Ministru Interior, Francisco Guterres, hafoin remata enkontru ne’e iha Ministériu Interior, Vila-Verde, sexta (28/07/2023).
Nia dehan, parseria servisu ne’e hare liu ba oinsa atu identifika área sira ne’ebé atu implementa programa liga ho diálogu, mediasaun no rekonsiliasaun iha komunidade nia let.
“Durante ne’e G7+ ajuda ona Diresaun Nasionál Prevensaun Konflitu iha áreas barak hodi halo mediasoens iha nivel munisipál, Suku no Aldeia sira liu-liu promove dame entre komunidade inklui resolve konfrontu entre Grupu Artes Marsiais iha munisípiu sira. Tanba ne’e Ministériu Interior kontinua servisu hamutuk hodi fortalese kooperasaun ne’e ho di’ak liutan”, subliña.
“Ita mós husu atu selebra akordu ida liu hosi Memerandu Entendimentu (sigla ingles;MoU) entre G7+ ho Ministériu Interior, hodi haree áreas mais importante liu-liu edukasaun sivika tanba G7+ iha rekursu ne’ebé potensia tebes. Entaun ita sei prepara kestoens atu dezena oinsá halo edukasaun sivika ba populasaun no komunidade sira liuliu joven sira, nune muda sira-nia mentalidade hodi partisipa iha dezenvolvimentu Nasionál ne’ebé oras ne’e lao daudaun”, tenik tan.
Govenante ne’e mos elojiu ho parseria servisu ne’ebé antes ne’e lao ona no nia iha esperansa katak ho akordu ne’ebé sei halo bele buka salusaun ba komunidade sira-nia problema no halo diálgu hodi promove dame iha territóriu nasionál.
Entretantu Sekretáriu Jerál G7+ Dr. Helder da Costa, kongratula Ministru ba pasta foun no fó-hatene katak prioridade hosi G7+ maka atu muda husi frajilidade ba reziliénsia, ne’ebé tuir vizaun sira nian ne’ebé iha.
“Knar prinsipál hosi G7+ maka atu promove dame iha rai laran, entaun ohin ami mós halo diskusaun produtivu sei iha inisiativa promove prevensaun konflitu nomós rezolusaun konflitu ba iha médiu prazu no longu prazu, tanba ofisialmente G7+ nia kna’ar maka promove pas no dezenvolvimentu iha rai laran no-mós partilla esperensia susesu sira ba rai ida ne’e”, salienta.
Tuir Helder da Costa, G7+ sai nu’udar espasu priviléjiu ida ba Timor-Leste atu kontribui ba pás no estabilidade liuhusi fahe esperiénsia kona-ba seguransa no defeza. Tanba ne’e, nia propoin atu organiza atividade konjunta ida ho nasaun membru G7+ sira seluk ho liga ba prevensaun nian.
“Ita mós hetan fiar husi Primeiru Ministru atu hodi halo kooperasaun servisu ida-ne’e hodi tun ba baze, halo mediasaun, advokasia, dissemina informasaun Ho ita nia jovem sira, nune hodi inspira nafatin jovem sira, para muda sira nia mentalidade hodi labele envolve an iha violensia”. salienta.
Sekretáriu Jerál ne’e mós apresia no kontente bele troka ideia ho Ministru Interior no noa parte sei dezeña programa ida ne’e ho pozitivu ba Populasaun sira iha área rurál hodi lori ba mundu Internasionál. #
