Díli, 06 Jullu 2026 (SRPM) – Ministru Interior, Francisco da Costa Guterres, Ph.D, prezide Serimónia Hasa’e Bandeira Nasionál ba semana dahuluk fulan Jullu, ne’ebé realiza iha edifísiu Ministériu Interior, Vila Verde, iha Segunda-feira ne’e.
Iha nia diskursu, Ministru Interior, Francisco da Costa Guterres, Ph.D, hateten katak, Ministériu Interior sei kontinua hadi’a no hametin servisu atu bele responde ho efisiente ba eventu no dezafiu sira ne’ebé mosu iha nasaun.
Nia mós subliña, importánsia implementasaun Planu Estratéjiku Ministériu Interior 2026–2040, ne’ebé sai hanesan matadalan ba servisu ministériu, ho objetivu no alvu ne’ebé klaru atu alkansa vizaun no misaun instituisaun nian.
“Ita estabelese ona servisu iha faze dahuluk, no agora tama ona iha fulan klaran, Tanba ne’e, ita hotu presiza hamutuk hametin implementasaun planu estratéjiku sira, atu povu bele moris hakmatek no hetan benefísiu husi dezenvolvimentu nasionál,” dehan Ministru Interior iha nia diskursu durante Serimónia Hasa’e Bandeira Nasionál.
Ezekutivu ne’e, salienta katak, faze dahuluk husi prosesu ne’e estabelese ona ho di’ak. Tanba ne’e, konvida funsionáriu hotu atu hamutuk hametin implementasaun planu estratéjiku sira, hodi nune’e povu bele sente benefísiu husi servisu públiku no dezenvolvimentu nasionál.
Governante mós husu ba funsionáriu hotu, atu kontinua aprende no hasa’e kapasidade profisionál, liuliu iha área hakerek, lee, no prepara relatóriu ho di’ak. katak kompeténsia hirak ne’e importante tebes atu hasa’e kualidade servisu administrativu no komunikasaun institusionál.
Aleinde ne’e, Ministru Interior bolu funsionáriu hotu atu hala’o servisu ho profisionál, mantein disiplina, integridade no responsabilidade iha fatin servisu, tanba ida-ne’e mak sai baze importante atu fó servisu públiku ne’ebé di’ak liu ba povu.
Ikusmai, Ministru Interior hato’o mós mensajen husi órgaun superiór Administrasaun Públika, ne’ebé alerta ba xefia sira no funsionáriu hotu iha Ministériu Interior atu hala’o knaar ho profisionál tuir tarefa no responsabilidade ida-idak, mantein disiplina, dezenvolve kapasidade an, hadi’a hahalok ne’ebé la di’ak, no hamoris nafatin hanoin pozitivu hodi hasa’e kualidade servisu no fó atendimentu ne’ebé di’ak liu ba komunidade.#buy
