Pante Makasar, 28 novembru 2023 (SRP) – Iha loron segunda ne’e, Ministru Interior, Francisco da Costa Guterres, partisipa seremónia loron istóriku nasionál Proklamasaun Independénsia ba dala 48, ne’ebé hala’o iha Kampo Futubol Oebau, Suku Costa, Sub Rejiaun Pante Makasar.
Ministru Interior, to’o iha fatin seremónia, jestór autoridade RAEOA akompaña to’o fatin ne’ebé prepara ona, tanba iha loron ne’e sai nudar inspetór ba seremónia isar bandeira, hodi selebra loron istoriku ida-ne’e.
Ministru Interior Francisco Guterres, ne’ebé prezidi seremónia Isar bendeira ne’e, iha inísiu fó onra ba eroes libertasaun da patria, liu husi um minutu de silénsiu, hodi agradese ba luta naruk ne’ebé povu Timor-Leste no eroes sakrifika an ba libertasaun Timor-Leste nian hafoin kontinua kedas hodi rona audiu tekstu Proklamasaun hosi saudozu Prezidente Proklamadór Francisco Xavier do Amaral iha oras tuku 09h30.
Komponentes parada hirak ne’ebé paritisipa iha seremónia ne’e maka, pelutaun ida hosi Komandu PNTL RAEOA, pelotaun ida husi DNSPP (Diresaun Nasionál Seguransa Patrimoniu Públiku), pelotaun ida husi Korpus Bombeiros iha mós ekipa seluk hanesan PAX, sivitas akadémika sira husi UNPAZ no UNTL, estudante CAFE nomós estudante sira iha Suku Costa laran. Enkuantu sai komandante parada iha seremónia ne’e maka Inspetór Xefi Polísia Herman Metan.
Seremónia espesiál ne’e Ministru Interior hetan akompañamentu husi Komandante Jerál PNTL Komisariu Jerál Polísia Henrique da Costa, Komandante Komandu Administrasaun PNTL Natercia Martins, Komandante Komandu RAEOA, Komandante UPF, Euclides Belo, Diretór Jerál Adminstrasaun Finansas Mariano de Araujo, lider relijioju, konsellu veteranu, sosiedade sivíl, hamutuk ho komunidade sira iha Sub Rejiaun Pante Makasar. # (Bui/AX).
