Dili, 21 marsu 2024 – Prezidente Konsellu Administrasaun Institutu Nasionál Seguransa Sosiál (INSS), Arlindo Pinto, hamutuk ho ekipa halo enkontru badak ida ho Ministru Interior (MI), Francisco da Costa Guterres, Ph.D, akompaña mós hosi Komandante Komandu Administrasaun PNTL, Superintendente Xefe Polísia Natércia Eufrásia Soares Martins, hodi koalia kona-ba, estatutu foun kontribuisaun membru PNTL ne’ebé atu tama iha idade reforma nian ba iha seguransa sosiál.
“Ohin ami-nia ekipa halo enkontru ho Ministru Interior, hodi koalia kona-ba polítika reforma liu-liu ba instituisaun PNTL ne’ebé durante ne’e halo kontribuisaun ba seguransa sosiál. Ami mós ajusta ona entre MSSI ho parte Ministériu Interior, konrkorda ona katak iha tempu badak sei kria tán ekipa traballu ida ne’ebé sei envolve Ministériu Interior no INSS ne’ebé tutela ba Ministériu Solidariedade Sosiál no Inkluzaun (MSSI), hodi diskute kona-ba rejime jerál, liuliu foku ba reforma seguransa PNTL nian”, dehan Prezidente Konsellu Administrasaun INSS, Arlindo Pinto, hafoin remata enkontru ne’e iha Ministériu Interior, Vila-Verde, kinta (21/03/2024).
Tuir nia, Ekipa traballu ne’e sei produs regulasaun balu iha area seguransa sosiál nian hafoin sei fahe matéria konaba simulasaun pensaun reforma no rejime kontributiva ba membru polísia sira antes tama idade reforma.
Hatan ba ida-ne’e Ministru Interior, Francisco da Costa Guterres, Ph,D, mós apresia no kontente ho kooperasaun servisu ida-ne’e, wainhira ekipa traballu ne’e kria ona regulasaun ba reforma nian bele ajusta ona ho sistema Lei Rejime Kontributivu Seguransa Sosiál nian ne’ebé durante ne’e estabelese ona. #(Bui/AX).
