Dili, 04 jullu 2023 (SRP) – Ministru Interiór (MI), Francisco da Costa Guterres, phD, iha loron tersa feira ne’e halo enkontru konsultasaun ho Eis Komandante Jerál PNTL sira hodi koalia kona-ba planu prioridade hodi reforsa lejislasaun no regras nune’e bele halo modernizasaun ba instituisaun PNTL ne’ebé simu responsabilidade tomak ba seguransa interna hodi hametin lei no seguransa publiku nasaun nian.
Planu hirak ne’e nudar kontinuasaun husi servisu ne’ebé antes ne’e planeadu ona hodi hametin vizaun estratéjika iha, lejislasaun, formasaun, disiplina, kapasidade administrativa no sistema aprovizionamentu hodi rezolve frakeza sira ne’ebé fó impaktu diretamente ba sustentabilidade operasoens polisiál nian.
Entretantu, Ministru Interior mós husu hanoin balu ne’ebé konstrutivu hosi eis komisáriu PNTL hirak ne’e, nune’e bele fasilita diak liutan Komandu PNTL atu implementa diretamente no monitoriza sira nia Planu Estratéjiku tinan lima nian inklui planu prioridade atu bele hamenus Konflitu liu-husi projetu Polisiamentu Komunitária (POLKOM), hodi hametin kolaborasaun servisu entre sidadaun sira no PNTL rasik.
Enkontru ne’ebé hala’o iha eskritóriu ofisiál Ministériu Interior, Vila-Verde ne’e, envolve eis Komandante Jerál PNTL sira hanesan, Julio Hornai, Faustino da Costa, Afonso de Jesus, no Mateus Fernandes. #AX
