DILI, 05 janeiru 2024 (SRP) – Ministru Interior (MI), Francisco da Costa Guterres, Ph.D, hala’o enkontru ho Diretores Jerais, Nasionais, no kargu diresaun no xefia tutela Ministériu Interior, hodi fó orientasaun polítika kona-ba preparasaun orsamentu no programa hodi ezekuta iha tinan 2024 nia laran.
“Horseik ita avalia ona progresu ezekusaun Orsamentu tinan kotuk nian kabe mós ba Polísia Nasionál Timor-Leste no Sekretaria Estadu Protesaun Sivíl no ohin ne’e atu halo preparasaun ba planu ezekusaun orsamentu iha tinan 2024, alende ne’e husu atu ita bo’ot sıra prepara programa prioridade sira hotu, liu-liu dezenvolvimentu atividades servisu no-mós dezafiu ne’ebé hasoru nune’e ba tinan oin ita bele prepara diak liután planu ne’ebé halo ona tuir ita-nia programa”. esplika Ministru Francisco, durane halo enkontru ne’e iha sala Migrasaun, Ministériu Interior, sexta ne’e.
Nia dehan, diresaun sivíl no PNTL presija halo preparasaun ba programa no orsamentu maibé haree mós ba prosesu ezekusaun orsamentu trimestrál nian hodi tau atensaun ba prosesu tomak.
“Sirkulár hau hasai ona tanba ne’e kaer diretiva ne’ebé iha hodi halo tuir siklu prosesu pagamentu. Husu para semana ida nia laran prepara relatóriu haruka mai gabinete hodi produs relatóriu fulan ne’en nian hodi sai hanesan mata dalan, selae ita lahatene tuir osan ne’e uza ba saida. Segundu halo jestaun orsamentu hodi kontrola ida-idak nia osan iha kada primeiru trimestrál hodi hatene tuir ita bo’ot sira gasta ba saida”, alerta.
Inspetora Gabinete Inspesaun no Auditoria aprezenta hela ba ministru kona-ba regras balun kona-ba OJE 2024
Governante ne’e esplika katak natureza finansas nian ne’e haree liu ba relatóriu servisu, nune’e nia sujere atu kada fulan presija halo atualizasaun nune’e wainhira tama iha fim do ano fokus deit ba orsamentu ikus hodi la prejudika funsionáriu sira halo servisu to’o kalan bo’ot.
“Ba rekursu umanu, presija halo supervizaun hodi atualiza fali mapa pesoál ne’ebé iha tanba hau rona informasaun funsionáriu balu muda ona ba fatin seluk. Nune’e mós ba Gabinete Planeamentu Estratéjiku (GPE) imi bele produz mak Key Performance Indicator ka ema bolu dehan Indikadór dezempeñu ba kada diresaun sira hodi haree se mak servisu la produtivu bele buka fali ema seluk. Kona-ba media nian sira agora muda fali ona ba Gabinete Asesoria Apoiu Jurídiku, maibé imi fó nafatin apoia ba sira”, akresenta.
Hafoin halo introdusaun badak Ministru Francisco husu ba diresaun tutela atualiza mós dezenvolvimentu servisu ne’ebé maka halo ona, inklui dezafiu no planu prioridade ne’ebé maka define ona hodi halo iha tinan 2024 nia laran tuir liña orientasaun ne’ebé sei delega.
Enkontru ne’e, hetan mós akompañamentu husi Diretór Jerál Administrasaun Finansas, Mariano de Araujo, Diretór Jerál Seguransa Prevensaun Konflitu, Gaspar de Sousa, Diretór Jerál Servisu Migrasaun, Inspetora Xefi Polísia, Adelaide da Rosa, Diretór Gabinete Planeamentu Estratejiku, Bendito Jose Casimiro, Inspetora Jerál Gabinete Inspesaun no Auditoria, Candida do Rosario B. Soares, Komandante Komandu Administrasaun PNTL, Superintendente Xefi polísia, Natercia Martins, asesór nasionais no-mós Xefi Gabinete sira. # (Oscar/Fatinha/AX).
