Ainaro, 06 outubru 2023 (SRP) –Ministru Interiór, Francisco da Costa Guterres, Ph.D, hamutuk ho Komandante Jerál PNTL, Komisáriu Jerál Henrique da Costa, hala’o vizita servisu ba Komandu Polisia Nasional Timor- Leste (PNTL) Munisípiu Ainaro, hodi haree besik liután kondisaun ne’ebé membru sira enfrenta no analiza problemas hirak ne’ebé PNTL Ainaro hasoru.
“Objetivu husi vizita ida ne’e maka atu hare direita ita bot sira kondisaun servisu, infrastrutura, transportes, ekipamentu apoiu servisu no rona prokupasaun ne’ebé maka durante ne’e enfrenta iha terenu”, esplika Francisco Guterres, perante halo sorumutuk ho estrutura tomak iha iha Komandu PNTL Munisipiu Ainaro.
Nia dehan, polítika Governu nian ne’ebe atribui mai Ministériu Interior maka atu moderniza, dezenvolve no kapasita membru PNTL hotu sai Profesional hodi garante paz no estabilidade iha rai laran.
“Hare ba rekursu ne’ebe limitadu ita halo ona enkontru iha Kosellu Ministru ita nia Primeiru-Ministru fó sai klaru ona katak tinan oin sei rekruta tan Membru Polisia 450 no orsamentu ba iha rekrutamentu ita tenki tau ketak. Tanba ne’e maka iha ne’e ita rektura buat rua rekrutamentu ba Ajentes no rekrutamentu ba Ofisiais. Tamba ne’e hau sei kolia ho Komandante Jerál ita halo uluk parte interna ninian depois maka ita loke ba públiku tamba ida ne’e ninia lalaok ne’e sei ba tó iha Akademia Polisia”, afirma governante ne’e.
Iha fatin hanesan Komadante PNTL Munisípiu Ainaro Superintendente Polisia Paulino Carmo Pereira, aprezenta difikuldade ne’ebé mak durante ne’e sira hasoru.
“Atu relata deit katak Komandu PNTL Ainaro iha membru hamutuk 107 kompostu husi Esquadra Hato-Udo, Hato-Builiku, Maubisse no Esquadra Ainaro Villa, maibe iha nain 2 maka foin lalais ne’e ba apoiu iha Fronteira entaun hela deit 105 no iha membru nain 2 maka moras. Alem de ne’e difikuldade ne’ebé maka ami enfrenta maka hanesan, menus rekursu humanu, menus Trasporte Operasional tamba kareta sira ne’ebé maka ita koloka ona balun diak no balun nia kondisaun la diak, maibe enjeral servisu operasaun lao diak”, dean Komandante Paulino.
Ministru Interior foto hamutuk ho estrutura Komandu PNTL munisípiu Ainaro
Hatan ba preokupasaun hirak ne’e Komandante Jerál PNTL, Komisáriu jerál Henrique da Costa hateten, ba tinan oin Komandu sei halo rekrutamentu hodi kompleta kuartelada no unidade ne’ebé menus rekursu.
“Kona-ba ita-nia númeru pesoál menus ne’e laos iha Munisípiu Ainaro deit mais iha fatin hotu inkuli mós unidade sira ita-nia ema la to’o tanba ita-nia rekrutamentu ne’e para tia ona iha tinan 4 ba kotuk ita laiha kontinuasaun rekrutamentu ninian.
Entaun ita halo ona komunikasaun ho Ministériu Interior no tuir orientasaun Sua Eselensia Ministru ninian ba tinan oin ninian ne’e ita hanoin atu halo rekrutamentu espera ita aprezenta ba iha Governu bele aprova para atu núne’e bele iha rekrutamentu kuandu iha rekrutamentu ita sei priense ba iha estruktura sira ne’ebé maka mamuk e mós mai apoiu tan iha ita bo’ot sira”, dehan lider másimu PNTL ne’e.
Entretantu vizita servisu ne’e hetan mós akompañamentu hosi parseria permanente PNTL nian hosi TLPDP (Timor-Leste Police Development Program), ne’ebé reprezenta hosi Mark Silvertand no asesór TLPDP Jose Turquel. # (Elisa, Oscar).
