Dili, 05 Dezembru 2023, (SRP) – Ministru Interior (MI), Francisco da Costa Guterres, Ph.D, halo enkontru ho Komandante Jerál PNTL, Komisáriu Jerál Henrique da Costa, Segundu Komandante Jerál PNTL, Komisáriu Pedro Belo, no-mós ofisiais superiór sira hodi rona aprezentasaun hosi asesór juridiku Ministériu Interior nian kona-ba revizaun estatutu PNTL nian antes aprezenta ba Konsellu Ministru.
Ministru Francisco da Costa Guterres,Ph,D, hateten, diskusaun ida ne’e, hodi bele re-organiza tiha estatutu nune bele konsolida tiha instituisaun PNTL ne’e.
“ Objetivu hosi esbosu ida-ne’e maka atu reve fali estatutu ne’ebé iha ona hodi reorganiza fali estrutura PNTL nian, segundu ita tenke hadia ona kondisaun servisu ba PNTL nian no terseiru maka deveres atu lao tuir regras ne’ebé estabelese ona. Entaun esbosu ida-ne’e atu fó klareza ba Komandu Jerál, Komandu Munisípiu to’o Eskuadra sira atu bele foti desijaun hodi bele konsolida PNTL rasik”, esplika Francisco Guterres, iha Auditóriu Sentru Formasaun Polísia Comoro, tersa (05/12/2023).
Komandante sira akompaña hela informasaun balun ne’ebé hato’o husi asesór sira iha ámbitu aprezentasaun kona-ba revizaun estatutu PNTL
Nia dehan, esbosu ida-ne’e atu halo mós ajustamentu ba renumeratoriu salariál, estrutura inklui mudansa mós ba karakteristika ba atuasaun polisiál no ezije liu ba kualidade atendimentu iha komunidade nia le’et.
“Ha’u husu atu iha diskusaun ne’e komandante sira bele fó mós ideia ruma nune’e haree liu ba kondisaun servisu Polísia nian no saida mak bele halo no labele halo iha estatutu ne’e rasik, tanba ne’e asesór sira tenke apresa lalais nune’e iha semana oin bele lori ba aprezenta iha Konsellu Ministru no Parlamentu Nasionál”, subliña.
Iha fatin hanesan, Komandante Jerál PNTL, Komisáriu Jerál Henrique da Costa, hateten maske lei orgánika no estatutu PNTL nian iha ona, maibé presiza nafatin atu bele armoniza ho progresu no dezenvolvimentu PNTL nian.
“Ita presija armoniza lei sira ne’ebé iha ona atu bele guia ita ho servisu ne’ebé iha. Ekipa tékniku halo aprezentasaun esbosu ba ita hotu no ita bele fó hanoin no komentariu ruma hodi bele hadia diak liután, tanba hakarak ka lakoi aban bairua lei ne’e sei implementa hodi regula ita hotu”, afirma lider másimu PNTL ne’e.
Marka prezensa iha enkontru ne’e envolve, Ofisiais Superiór Komandu Jerál PNTL, Komandu Kuartelada sira, Komandu PNTL Munisipál sira inklui Komandu rejionál RAEOA no-mós asesór jurídiku Ministériu Interior no-mós Gabinete Jurídiku Komandu PNTL nian. # (Bui/AX).
