RAEOA, 13 outubru 2023 (SRP) -Ministru interior. (MI), Francisco Guterres, akompaña hosi Komandante Komandu Administrasaun PNTL Superintendente Xefi Polísia, Natercia Martins, hamutuk ho Komandante PNTL RAEOA Superintendente polísia Nicolau Francelino da Costa, inkiu ekipa tékniku sira, superviziona progresu implementasaun konstrusaun Postu foun UPF iha Sub-Rejional Oesilo, RAEOA (Rejiaun Administrativu Espesiál Oe-Cusse Ambeno).
“Ohin ita kontinua vizita mai haree ho matan fasilidade báziku no lakunas ne’ebé ita-nia UPF no Migrasaun sira enfrenta hodi ita buka hadia nune’e PNTL sira ne’ebé presta servisu bele halo knar ho diak liután atu lori mos dezenvolvimentu ba iha Sub Rejionál Oesilo”, esplika Ministru Interior, Francisco Guterres, iha Suku Bobometo, Sub-Rejionál Oesilo, sesta (13/10/2023).
Tur nia, fronteira Oesilo nia baliza rabat kedas ho fronteira Kefa-Indonézia nian entaun presija tebes melloramentu ba infraestrutura no ekipamentu atu membru sira bele halo atendementu públiku diak ba komunidade sira ne’ebé presija hetan tulun husi autoridade seguransa sira hodi kontribui ba estabilidade nasionál.
Kestiona kona ba postu UPF iha fatin seluk, nia hateten iha kondisaun balu diak ona, maibé bee moos mak araska tanba maioria postu sira ne’e halo iha foho leten.
“Ohin sıra mos aprezenta kona-ba bee laiha tanba maioria sira iha liu foho lolon, bee labele sa’e to’o iha ne’ebá, ita muda postu mós labele, fatin ne’e tenke iha ne’ebá duni, tanba ne’e hau orienta ona tékniku sıra haree para oinsá bele fura bee,” nia hateten.
Hafoin remata vizita hosi Postu Migrasaun no Postu UPF Oesilo, ekipa kontinua kedas ba haree direta progresu implementasaun projetu konstrusaun Postu foun UPF Oesilo, ne’ebé lokaliza iha Sub-Rejiaun Pante Makasar, Rejiaun Administrativu Epesiál Oe-Cusse Ambeno – RAEOA).
Iha vizita ne’e ekipa tekniku sira husu atu suspende lai obra refere tanba polítika Guvernu foun nian hakarak postu PNTL hotu ne’ebé halo naturalmente nia kualidade tenke dura ba tempu naruk nune’e labele gasta osan barak liután.
Razaun halo suspensaun tanba ekipa tékniku sira deskobre lakunas balu no presija halo fali redezeñu ba obra refere hodi haree fali kada item hodi ajusta ba BOQ nune’e bele rezolve fali problema ne’ebé ekipa tékniku sira deskobre ona. # (Bui, Oscar. AX).
