RAEOA, 15 outubru 2023 (SRP) – Ministru Interiór, Francisco da Costa Guterres, Ph.D, hamutuk ho Komandante Komandu Administrasaun PNTL, Superintendente Xefi Natercia Martins no tékniku sira hala’o vizita servisu ba Postu UPF sira ne’ebé lokaliza iha Sub Rejionál Pasabe, RAEOA nian.
“Ohin hau hanesan reprezentante Guvernu hamutuk ho ekipa tékniku sira mai atu haree no halo kontrolu ba postu UPF hotu inklui eskuadra no kuartel munisipál sira. Hau hamutuk ho ekipa integradu ida-ne’e mai ho estratejia no vizaun diak hodi dezenvolve setór seguransa ho sistema kontrolu no jestaun fronteira ida ne’ebé diak nune’e bele protejidu ba ema hotu”, esplika Francisco Guterres, durante halo vizita ofisiál ne’e iha Postu UPF Faotbasin, iha Suku Abani, Sub Rejionál Pasabe.
Tuir Francisco, agora daudaun nia parte hakarak halo modernizasaun ba PNTL bazeia ba planu prioridade Guvernu nian maka hadia uluk infraestrutura mudar nesesidade báziku PNTL nian ne’ebé sei lao fazendamente.
“Postu UPF sira ne’ebé ita identifika ona sei halo mudansa hotu liu hosi rehabilitasaun no balu halo foun fali no sei kompleta ho ekipamentu apoiu be mos, ahi tore vizilánsia, tore ba radio komunikasaun nian”, dehan tán.
Biban ne’e, Ministru Interior Francisco Guterres, kongratula membru sira nia servisu tanba ho limitasaun ne’ebé enfrenta sira kontinua servisu no nia sei esforsu atu buka solusaun ba kondisaun hirak ne’ebé nia rona no haree rasik.
Iha okajiuan ne’e komitiva mós halo vizita ba Postu UPF Cruz no Postu UPF Mahata ne’ebé lokaliza iha area Nitibe nian hodi haree direta kondisaun ne’ebé membru sira enfrenta no identifika katak postu hirak ne’e presija halo rehabilitasaun totál tanba kondisaun ladiak ona.
Vizita ne’e hetan akompañamentu hosi Komandante Komandu PNTL RAEOA Superintendente polísia Nicolau Francelino da Costa, Komandante UPF Interinu, Superintendente Asistente Polísia, Carlos Moniz Maia, Ofisiál Apoiu Komandu PNTL RAEOA, Inspetór Xefi, Bernardo Freitas, Diretór Nasionál Aprovizionamentu, João da Cruz, Xefi IT PNTL, Inspetór Xefi Polísia Deklino C. Marcal no-mós ekipa tékniku sira hosi Ministériu Interiór nian. # (Bui, Oscar, AX).
