RAEOA, 16 outubru 2023 (SRP) – Ministru Interiór, Francisco da Costa Guterres, Ph.D, hamutuk ho Komandante Komandu Administrasaun PNTL, Superintendente Xefi Natercia Martins no tékniku sira hala’o vizita servisu ba Postu seguransa sira ne’ebé lokaliza iha Sub Rejionál Nitibe , Rejiaun Administrativa Espesiál Oé-Cusse Ambeno (RAEOA).
“Ohin ita halo vizita mai iha Citrana hodi identifika postu UPF Citrana no migrasaun nia kondisaun tama iha kategoria hodi halo rehabilitasaun no ohin fo ona orientasaun ba tékniku sira hodi halo dezeñu integradu tanba ita tau osan ba halo rehabilitasaun no balu halo foun hodi ajuda membru sira servisu ho dignu”, dehan Ministru Francisco Guterres, iha Postu UPF Citrana iha Aldeia Manan, Suku Bene Ufe, Sub-Rejiaun Nitibe.
Nia dehan, konstrusaun postu UPF foun no balu tama iha klasifikasaun rehabilitasaun sei halo prototype ho dezeñu integradu ne’ebé kompletu kedas ho fasilidade ahi, bee no karteiras.
“Agora kona-ba postu seguransa foun tuir loloos hotu ona iha tinan kotuk, maibé ita halo verifikasaun kalen deit mós taka seidauk hotu entaun prontu ita tau osan hodi hadia no hasai kalen uza fali blok ba laran hodi dura ba tempu naruk”, afirma.
“Tuir orientasaun Primeiru Ministru nian katak Guveru ida-ne’e iha komitmentu hodi hametin seguransa fronteira atu proteje territóriu nasionál hodi kombate tráfiku umanu, kontrabandu migrante no forma sira seluk krime organizadu transnasionál nian”, nia fó hanoin.
Ministru Interior hamutuk Superintendente Xefi Natercia Martins no tékniku sira foto hamutuk ho estrutura PNTL Rejionál Nitibe, Rejiaun Administrativa Espesiál Oé-Cusse Ambeno
Governante ne’e salienta, ho situasaun atuál ne’ebé mosu iha tinan kotuk presija tebes hadia fronteira hodi aumenta tán postu seguransa nune’e bele haforsa servisu kontrolu seguransa iha fronteira entre Indonezia ho Timor-Leste.
Rekorda fali katak postu seguransa UPF tolu ne’ebe halo ho orsamentu Ministeriu Interior nian iha Guvernu anterior mak hanesan Postu UPF Sakato iha Suku Nipani, Sub Rejiaun Pante Makasar, Postu UPF Citrana iha Aldeia Manan, Suku Bene Ufe, Sub-Rejiaun Nitibe no Postu UPF Oesilo iha Aldeia Usapi Kolen, Suku Bobometo Sub rejiaun Oesilo.
Hafoin remata vizita postu Citrana, Ministru Interior ho komitiva mos halo vizita ba Eskuadra PNTL Baoknana no identifika katak radio base la funsiona iha area refere. Nune’e Ministru mos orienta tekniku no IT hosi PNTL halo kedas manutensaun ba radio komunikasaun funsiona fali ho diak.
Biban ne’e Ministru ho komitiva mos halo vizita ba Postu UPF Aeroportu Internasional Rota do Sândalo, ne’ebe lokaliza iha Pante Makasar# (Bui, Oser, AX)
