Dili, 02 dezembru 2023 (SRP) – Ministru Interior, Francisco da Costa Guterres, Ph.D, hetan akompañamentu hosi Komandante Jerál PNTL Komisariu Jerál Polísia Henrique da Costa no Segundu Komandante Jerál PNTL Komiáriu Polísia, Pedro Belo, halo vizita servisu mai iha Kuartel Jerál Unidade Polísia Marítima (UPM), Largo Lecidere Dili.
Objetivu husi vizita ida-ne’e atu haree situasaun jerál no-mós kondisaun servisu iha ne’ebé iha nune’e atu buka hatene dezafius ne’ebé membru UPM sira enfrenta hodi fó solusaun.
Komandante UPM, Superintendente Polísia Eugenio Pereira, haksolok ho vizita ne’e hodi bele motiva di’ak liután nia membru sira. Inklui aprezenta mós progresu servisu no dezafius ne’ebé durante ne’e sira hasoru.
“Ohin hanesan provilejiu bot ida mai ami hetan oportunidade simu Ministru Interior nia vizita iha ami-nia fatin. Ami fiar katak ho autoridade polítika hosi Ministru Interior mai haree direta ami-nia kondisaun nune’e bele iha jestaun di’ak ba PNTL atu bele lori solusaun ba UPM”, esplika Komandante Eugenio Pereira, iha Kuartel UPM Largo Lecidere Dili, 01/12/2023.
Iha biban ne’e, Eugenio relata mós kazu insidente no asidente inklui potensia, ameasa risku no dezafiu ne’ebé hasoru durante halo seguransa hodi asegura area marítima nian.
“Haree ba dezenvolvimentu ne’ebé iha liu-liu planu estratejiku IX guvenu nian ba konseitu ekonomia azul ne’ebé refere ba atu uza ka aproveita rekursu tasi nian. Entaun planu ne’e integra ho ami-nia servisu maibe presija mós apoia balu hosi Guvernu hodi fasilita di’ak liután kondisaun mínimu ne’ebé ami enfrenta”, salienta.
Ministru Interior foto hamutuk ho estrutura Unidade Polísia Marítima (UPM) inklui parseiru dezenvolvimentu sira.
Hatan ba ida-ne’e, Ministru Francisco, hateten preokupasaun hirak ne’ebé nia rona no haree rasik, sei aponta hodi nune’e bele iha planu ida ne’ebé di’ak. Tanba Guvernu persija kria kondisaun ne’ebé di’ak liu-liu ba infraestrutura instituisaun PNTL hotu.
“Ida-ne’e fó hanoin hau katak ita iha komponente rua importante tebes atu asegura dezenvolvimentu ida mak naval ida mak terestre. Tanba Governu sei fó prioridade ba elaborasaun Polítika Ekonomia Azúl iha Timor-Leste, maibé dezenvolvimentu ita hahu fazeadamente. Agora maioria ita haree uluk ba infraestrutura UPF no UPM tau fali ba 2024”, dehan tan.
Governante ne’e mós garante katak, Governu sei esforsu nafatin atu buka solusaun ba kondisaun hirak ne’ebé membru UPM enfrenta liu-liu ekipamentu apoiu no infraestrutura baziku.
“Imi-nia papel importante, agradese ba imi apezar kondisaun mínimu mas bele halo servisu. Husu ba ita bo’ot sira atu kontinua ativu halo vizilánsia no responde ho kondisaun ne’ebé iha. Hau haree hela ne’ebé mak mai urjente ne’e ita responde kedas”, subliña.
Iha biban ne’e, Ministru Francisco husu ba Komandante UPM ho estrutura tomak atu promove konxiénsia koletiva kona-ba importánsia biodiversidade tasi nian. Haree liuba prezervasaun no limpeza iha área tasi, programa ne’e la’ós haree de’it importánsia vitál rekursu tasi nian, maibé mós hakarak insentiva prátika sustentável ne’ebé bele hasa’e turizmu no promove ekonomia azúl iha nasaun, hodi hametin kompromisu nasionál ida-ne’ebé ho prevensaun ambientál no dezenvolvimentu sustentável.
Vizita ne’e partisipa mós husi Komandante Komandu Operasaun Nasionál PNTL, Superintendente Xefi Polísia Jose Soares, Komandante Komandu Pesoál no Formasaun, Superintendente Xefi Polísia, Arquimino Ramos, Komandante Komandu Administrasaun Nasionál, Superintendente Xefi Polísia Natercia Eufragia Soares Martins, Komandante TLPDP, Darren Booy, Xefi Gabinete, Xefe Departamentu no membru sira husi Unidade Polísia Marítima (UPM). #(Bui/AX).
