Dili, 28 dezembru 2023 (SRP) – Ministru Interior (MI), Francisco da Costa Guterres, Ph.D, hamutuk ho estrutura tomak realiza seremonia Avaliasaun Servisu no Reflesaun kalan Natal Hamutuk hodi hametin amizade no unidade entre instituisaun tutela iha Ministeriu Interior.
“Ohin oportunu tebes ita lori familia mai konsentra hodi festeza natál hamutuk nu’udar reflesaun hodi halo avaliasaun ba servisu ekipa iha Ministeriu Interior hodi hanoin hikas saida maka ita halo tinan ida liu ba. Tanba ne’e ita bolu ita bot sira hamutuk ho familia mai iha ne’e para halo avalisaaun hodi hatene ita la’o to’o ona iha nebe nune’e ba tinan 2024 labele lao sala para ita alkansa objetivu final”, esplika Ministru Francisco Guterres, iha Salaun Oka, Hudi-Laran, (28/12/2023).
Biban ne’e Ministru Francisco agradese ba familia sira ne’ebé durante ne’e koopera diak tebes, tanba funsionariu sira hahu kedas hosi PNTL, Migrasaun , Bombeiros, Seaguransa Sivil no Protesaun Sivil presta servisu lahatene kalan ka loron lahatene feriadu nune nia agradese ba família sira ne’ebé marka prezensa iha serimonia ne’e bele rona ida-nee hodi hatene no kompriende servisu prisipal hosi funsionariu sira.
Partisipante sira sunu lilin iha kalan reflesaun
“Hau lori guvernu no estadu nia naran agradese ba familia sira ne’ebe ohin marka prezensa iha ne’e tanba ita bot sira nia oan, inan no aman komprende servisu nebe mak halo ba estadu ida nee. atu atinji dezenvolvimentu sustentavel sei iha dezafiu lubuk ida hein ita iha oin, maibe presija seguransa entaun papel imi nian importante nudar elementu prinsipal ba dezenvolvimentu pais nian tanba imi halo servisu para fo hakmatek ba povu. Ikusliu ha’u hato’o boas festas santo natál no tinan foun ba ita tomak”, nia hakotu.
Iha Serimónia festa Natal hamutuk ne’e partisipa mós hosi membu Guverun sira inklui deputadu sira husi Komisaun B Parlamentu Nasionál ne’ebe trata asuntu Negosiu Estranjeiru, Kooperasaun, Defeza no Seguransa, hodi festeza ksolok Natal hamutuk ho funsionáriu sira iha Ministeriu Interior. # (Oscar/AX).
