RAEOA, 15 outubru 2023 (SRP) – Ministru Interiór, Francisco da Costa Guterres, Ph.D, hamutuk ho reprezentante Komandu Jerál PNTL, Natercia Martins, no tékniku sira hala’o vizita servisu ba Postu seguransa UPF sira ne’ebé instala iha Sub Rejionál Oesilo, RAEOA.
“Postu UPF Quibiselo nian ita bele dehan diak ona entaun ita kompleta tán mak tore vizilánsia, mobiliariu, bee mós, radio komunikasaun nomós ekipamentu vizilánsia nian”, hateten Ministru Interior, Francisco Guterres, iha Aldeia Quibiselo, Suku Bobometo, sábadu (14/10/2023).
Tuir nia, Postu Quibiselo sai mós sentru ba transaksaun ilegál tanba besik kedas ho fronteira Kefa Indonézia nian.
“Ami mai atu haree imi-nia fatin seguransa iha fronteira tomak tanba ne’e hau lori mós ekipa tékniku sira mai halo akompañamentu, monitorizasaun no avaliasaun atu ajuda kria kondisaun diak nune imi bele servisu didiak haree batas ne’e”, subliña.
Iha biban ne’e, Ministru Francisco husu ba komunidade sira atu servisu hamutuk ajuda PNTL wainhira hetan ema ruma tama tuir dalan ilegál.
“Nasaun ida-ne’e ita hotu nian karik haree ema tama la tuir dalan entaun halo kedas prevensaun hodi informa ba Polísia no UPF hodi halo protesaun nune’e labele estraga imi hotu”, afirma.
Vizita ne’e hetan akompañamentu hosi Komandante Komandu PNTL RAEOA Superintendente polísia Nicolau Francelino da Costa, Komandante UPF Interinu, Superintendente Asistente Polísia, Carlos Moniz Maia, Komandante Operasaun Komandu PNTL RAEOA, Inspetór Xefi, Bernardo Freitas, Diretór Nasionál Aprovizionamentu, João da Cruz, Xefi IT PNTL, Inspetór Xefi Polísia Deklino C. Marcal no-mós ekipa tékniku sira hosi Ministériu Interiór nian. # (Bui, Oscar, AX).
