Dili, 06 Maiu 2024 (SRP) – Ministru Interior, Francisco da Costa Guterres, Ph.D, akompaña husi Sekretáriu Estadu Protesaun Sivíl, Domingos Mariano Reis prezide Serimónia Isar Bandeira Nasionál semana dahuluk, iha edifísiu Ministériu Interior, Vila-verde, segunda-feira ne’e.
“Eroi sira la ezije buat ida mai ita maibé ita tenke hatutan buat ne’ebé mak sira husik hela mai ita, dala barak ita hamrik kleur ita komesa nakdoko ona, ita haluha tiha sira ne’ebé uluk toba deit iha udan laran, subar iha fatuk kuak la han, tahan udan been, loron manas, han deit mak ai-tahan hodi augenta no ohin loron ita bele hamriik nudar nasaun independente ida, balun mate ona no balun sei moris hela to’o ohin loron, ohin loron ita haluha tiha sira-nia sakrifisiu, hau husu ba imi no ita hotu hatudu ispíritu nasionalizmu no patriotizmu hodi servi rai no nasaun ida-ne’e’’, Ministru Interior ezije.
Perante diskursu ezekutivu ne’e kontinua husu ba funsionáriu sira servisu ho disiplina no mantein ordem servisu tuir iérarkia no regulamentu sira.
“Ba funsionáriu sira tenke dedika a’an ho loloos iha knaar fatin, rai ida-ne’e
eroi no eroina sira sakrifika a’an no mate hodi liberta povu no ohin loron hamriik nudar nasaun independente ida, agora ita-nia luta nain sira balun sei moris, balun bala sei iha sira-nia isin lolon, hodi nune’e ita ida be moris, hanesan jerasaun foun tenke servisu ho fuan no laran hodi hadia no servisu ba oin ho di’ak liután”, orgaun superiór administrasaun públika ne’e salienta.
Seremónia isar bandeira ne’e hetan partisipasaun másimu husi Komisárius PNTL, asesór sira, funsionárius husi Diresaun Jerál Administrasaun no Finansas, Diresaun Jerál Servisu Migrasaun, Diresaun Jerál Seguransa Prevensaun Konflitu, Autoridade Protesaun Sivíl, Bombeiros no kargus diresaun xefia sira.# Ekipa SRP.
