Atabae, 15 dezembru 2023 (SRP) –Ministru Interior (MI)Francisco da Costa Guterres, Ph.D, halo enseramentu ba formasaun integradu mediadór DNPKK hamutuk nain 269 ne’ebé realiza iha Suku Rairobo, Postu-Administrativu Atabae, Munisípiu Bobonaro.
Ba dahuluk, Presidente Komisaun Organizadora Domingos Dokar, hato’o ninia relatóriu no rezultadu formasaun hahú hosi preparasaun, mobilizasaun rekursu, lojistíku, finansiamentu, protokolu, kooperasaun ho liña-ministériu no dezafiu sira ne’ebé mak komisaun organizadora hasoru durante formasaun.
Ministru Interior, Francisco da Costa Guterres, iha ninia intervensaun elojia formandu sira kona-ba etika, disiplina, lideransa, jestaun, prosedimentu, taktika, paixaun, no koezaun servisu kolektiva durante tuir formasaun ne’e.
“Ha’u fó parabéns ba fomandu sira hotu ne’ebé durante fulan ida nia laran husik hela família hodi partisipa iha formasaun ida-nee. Formasaun ida-ne’e nu’udar programa ida ba kapasitasaun rekursu humanu nune’e ita bo’ot sira bele aprende buat ruma para lori hanesan bukae hodi hala’o ita bo’ot sira -nia knaar iha komunidade nia leet no servi rai ida-nee”, esplika Francisco Guterres, iha Sentru Treinamentu 1° Sargento Aquelis da Silva-Rairobo, sesta (15/12/2023).
Governante ne’e husu ba formandu sira atu aplika matenek ne’ebé hetan hodi servi povu nune’e wainhira rai ne’e hakmatek bele lori dezenvolvementu no benefisiu ba rai no povu ida-ne’e.
“Ita bo’ot sira povu ida-nee nia oan, povu ne’e presiza ita bo’ot sira atu tún ba ajuda sira atu servi rai ida-nee. Fila ba servisu ho di’ak mantein dixiplina hanoin nafatin Rairobo hanesan mata dalan ba imi hodi bele halao imi-nia servisu, husi nee sei motiva imi halo servisu ho diak. Espera katak matenek sira ne’ebé instrutór no peritus sira hato’o bele uza no util iha ninian implementasaun ba rai doben Timor-Leste nia diak”, Ministru Francisco afirma.
Iha okajiaun ne’e Ministru Interior ne’e mós agradese ba formadór sira ne’ebé oferese ona formasaun durante fulan ida ba formandu sira atu kadi sira ninian badaen, matenek, esperiénsia hodi implementa iha servisu fatin nudar mediadór iha kada munisípiu.
“Hakarak kongratula Komandu Jerál PNTL ne’ebé disponibiliza formadór sira ne’ebé maka diak hodi mai hanorin formandu sira por minímu fó hela kunhesementu báziku ba ita nia mediadór sira iha ne’e. Hau mós hakarak agradese ba Tribunál Rekursu, Prezidensia Repúblika, Komisaun Funsaun Públika no-mos ba membrus governu no deputadu sira hosi Parlamentu Nasionál ne’ebé mai to’o iha ne’e Rairobo hodi fahe informasaun no matenek ba formandu sira” salienta. #(Fatinha/Alu/Bui).
