Maubara, 17 dezembru 2023 (SRP) – Guvernu liuhosi Ministru Interior, hamutuk ho Instituisaun tutela, hala’o semináriu kona-ba Planu Estratejiku Seguransa ho tema “Hadia, Hametin no habelar servisu hodi alkansa vizaun seguransa interna 2030” ne’ebé hala’o durante loron rua iha Postu Administrativu Maubara, Munisípiu Liquiça.
“Koalia kona-ba Planu Presija seguransa ita entende uluk lai katak ita agora to’o ona iha ne’ebé no oinsá atu ita ba to’o iha ne’ebá, hodi responde no konsolida baze seguransa”, esplika Francisco Guterres, iha salaun Madre Carmelita, Maubara-Fatubesi ne’ebé lokaliza iha Suku Vaviquinia, Postu-Administrativu Maubara, Munisípiu Liquiça.
Nia dehan, estratéjia seguransa ne’e hanesan planu nivel aas ida-ne’ebé dezeña atu atu alkansa objetivu ka rezultadu espesífiku sira no ajuda atinji metas seguransa nian ba estabilidade.
“Iha tinan 2007 mai 2009 ita bo’ot sira responde ba kestaun rua ne’ebé importante tebes maka konsolida forsa hodi asegura seguransa iha territóriu tomak no segundu konsolida instituisaun komandu. Maibé ita pauza iha implementasaun tanba krize institusionál no iha buat balu la kondiz ona ho situasaun atuál”, fundamenta.
Tuir nia, estratéjia seguransa ne’ebé define iha momentu ne’ebá hanesan konsilida ona baze seguransa no ninia komponente oin-oin atu alkansa estadu ida-ne’ebé hakarak iha futuru.
Diskusaun grupu ne’ebé hala’o iha ámbitu semináriu Planu Estratejiku Seguransa husi komandante PNTL
“Wainhira UN atu halo reestrutura tomak ita desidi labele tanba kada Komandu Distritu sira sei iha so Komandante Jerál de’it mak laiha no tau de’it komandante interinu ida tenta atu kontrola Munisípiu hodi konsolida forsa. Ita fó honra no apresiasaun hodi tula deviza lapresija submete ba teste ruma. UN dehan haruka sira teste foun hotu hau dehan lae sira ne’ebé lidera Komandante Distritu no eskuadra ita kria kondisaun ba sira”, konta tuir.
Governante ne’e hatutan, iha tinan 2012 antes UN sai PNTL preparadu tebes no ida-ne’e sai hanesan rezultadu husi prosesu planeamentu detalladu ne’ebé Guvernu haree no dirije atu asegura instituiusaun ne’e ba tempu naruk.
“Momentu ne’ebá avaliasaun seguransa ba konfiansa foin maka 3.5. maibé iha tinan 2015 nivel konfiansa ba PNTL sa’e kedas ba 9.6, entaun ida-ne’e mak ita komesa konsolida di’ak ona seguransa tanba uza rekursu sira ne’ebé disponivel no maximiza pontu forte sira hodi jere ema nia tauk sai ba ema ne’ebé la sente tauk ona”, subliña.
Iha okajiuan ne’e, Ministru Interior hateten, presija separa kestaun seguransa ho seguridade tanba iha kazu ne’e, lia-fuan seguru iha kontestu protesaun refere ba aktu defeza, atu evita buat ruma, ameasa ka perigu ruma, minimiza no halakon kualkér tipu risku ba vida no/ka propriedade.
“Tempu ona ita presija promove kultura seguransa nian, halo aprosimasaun estratéjiku sira ne’ebé ho objetivu atu prevene, deteta no korrije violasaun seguransa nian, bazeia ba prinsípiu legál sira, iha misaun, vizaun no instituisaun nian, liuhusi adopta prátika seguransa ne’ebé di’ak liu”, tenik tán.
Ministru Interior, Francisco da Costa Guterres, Ph.D, ne’ebé prezide semináriu ne’e hamosu pontu lima importante hodi responde ba situasaun atuál no aprezenta ideia ba komisaun hodi elabora no realiña Planu Estratéjiku Ministériu Interior nian hodi autonomiza konseitu seguransa interna ba tinan 2011-2030.
Marka prezensa iha semináriu ba loron daruak ne’e envlove Instituisaun tutela Ministériu Interior, Sekretaria Estadu Protesaun Sivíl, Autoridade Protesaun Sivíl, Estrutura Komandu Jerál PNTL, Diresaun Jerál Servisu Migrsaun, Diretores Jerais, Diretores Nasionais, Corpo Bombeiro, Corpo Seguransa Sivíl inklui asesór tékniku no jurídiku sira. Entretantu Semináriu ne’e responsabiliza husi estrutura tomak iha Gabinete Planeamentu Estratéjiku (GPE). # (Oscar/Fatinha/AX).
