Dili, 07 dezembru 2023 (SRP) – Ministru Interior, Francisco da Costa Guterres, Ph,D akompaña Primeiru Ministru (PM), Kayrala Xanana Gusmão, hodi prejidi juramentu ba membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) ne’ebé involve iha Grupu Arte Marsial (GAM) no Grupu Arte Rituais (GAR) hodi husik hela no servi de’it povu no estadu Timor-Leste.
Juramentu ne’ebé hala’o iha Palásiu Guvernu, atu forsa rua bele kumpre de’it maka Konstituisaun RDTL, artigu 147 (Polísia ho forsa seguransa) tenke defende legalidade demokrátika no garante seguransa interna ba sidadaun hotu no la inklina ba partidu no grupu ruma.
Primeiru Ministru hateten seremónia ida-ne’e hodi muda hahalok iha ita-nia sosiedade nia laran, maske juramentu hanesan hala’o tia ona iha tinan 2009 maibé tanba la kumpri nune’e hala’o hikas iha loron istoriku 07 Dezembru 2023 “Dia da Memoria” okupasaun Indonézia mai Timor-Leste iha tinan 1975.
Serimonia juramentu ne’e asina simbolikamente hosi Komandante Unidade Espesiál Polísia (UEP) Superintendente Polísia Damião Correia, Ofisiál F-FDTL, Komandante Batallaun Ordem Públika (BOP) Superintendente Asistente Silveiro de Araujo, Xefe Departamentu Tránzitu Seguransa Rodoviáriu Nasionál (DTSRN) Superintendente Asistente, Luis da Costa no kontinua kedas entrega atributu organizasaun nian ba PM Xanana.
Marka prezensa iha seremónia ne’e envolve Ministru Defeza, Pedro Klamar Fuik, Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, Komandante Jerál Polísia Nasionál Timor-Lestes (PNTL), Komisáriu Jerál Henrique da Costa, Segundu Komandante Jerál PNTL, Komisáriu Polísia Pedro Belo, membru deputadu sira hosi Komisaun B Parlamentu Nasionál, Lider relijiozu sira inklui ofisiais superiór sira hosi F-FDTL no PNTL. # (Oscar/Bui/AX)
