Atabae, 02 dezembru 2023 (SRP) – Ministru Administrasaun Estatál (MAE), Tomas dó Rosario Cabral, hamutuk ho ekipa tékniku sira halo palestra kona-ba desentralizasaun no estabelesimentu orgaun poder lokál ba mediadór no pontu fokál prevensaun konflitu komunitaria iha iha Sentru Treinamentu 1° Sarjentu Aquilis da Silva Rairobo, Postu-Administrativu Atabae, Munisípiu Bobonaro, (01/12/2023).
Iha aprezentasaun tékniku sira hosi Ministériu Administrasaun Estatál ko’alia liu kona-ba prioridade importante governu nian atu desentraliza podér lokál, ne’ebé iha papél importante hodi asegura funsionáriu públiku sira komprende no ezekuta sira-nia knaar ho efetivu.
Durante sesaun ne’e, Ministru Tomas do Rosario Cabral mós fahe material esensiál sira relasiona ho desentralizasaun administrativa no estabelesimentu órgaun reprezentativu podér lokál sira. Materiá hirak-ne’e ho objetivu atu fornese kompriensaun kle’an ba formandu sira kona-ba oinsá sira-nia servisu bele fó impaktu pozitivu no lori governasaun besik ba populasaun iha Munisípiu, Postu-Administrativu, Suku, Aldeia no bairu sira.
Iha biban ne’e, governante ne’e hateten, poténsia formandu sira-nian atu apoia autoridade lokál sira hodi prevene konflitu iha sira-nia komunidade laran, hodi subliña importánsia husi esforsu kolaborativu entre ministériu sira atu suporta inisiativa sira ho objetivu atu hamenus konflitu no promove dezenvolvimentu iha Timor-Leste.
Formandu sira, ne’ebé partisipa iha sesaun ne’e, ho entuziazmu halo pergunta ativamente hodi buka hatene klean liutan kona-ba prosesu desentralizasaun no estabelesimentu órgaun podér lokál sira.
Alem de ne’e, formandu sira mos hetan priviléjiu hetan informasaun diak husi Ministru Cabral, ne’ebé fahe ninia esperiénsia no enkoraja sira atu implementa sira-nia koñesimentu foun hamutuk ho autoridade lokál wainhira servisu iha baze.
Ministru Cabral hateten katak Administrasaun Estatal oras ne’e daudaun kolabora ho ajénsia internasionál sira, inklui UNDP, atu estabelese kontrolu úniku iha kada munisípiu. No koopersaun ho Ministeriu Interior iha futuru maka sei kria sistema relatóriu uniku, resposta emerjénsia sentralizadu, polísia komunitaria, asisténsia polísia virtuál hodi fornese plataforma streamline prosesu ba sidadaun sira, fasilita prosesu efisiente ba dokumentu sira hanesan karta identifikasaun, Pasaporte no seluk tan.
Iha okajiuan ne’e, Ministru Interior, Francisco da Costa Guterres, Ph.D, espresa nia agradesimentu ba Ministru Estatal ho komitiva ne’ebé iha kolaborasaun di’ak hodi apoia formasaun liuhosi péritu no tékniku tanba ho palestra ne’e atu eleva kuñesementu komprensivu formandu sira nian kona-ba desentralizasaun podér administrativu no estabelesimentu órgaun reprezentativu podér lokál iha territóriu nasionál tomak.# (Oscar/Fatinha/AX).
