Atabae, 12 dezembru 2023 (SRP) – Ministru Interior, Francisco da Costa Guterres, Ph.D, segunda feira ne’e sai oradór iha ámbitu formasaun bá mediadores no pontu fokál prevensaun konflitu ne’ebé realiza iha Suku Rairobo, Postu-Administrativu Atabae, Munisípiu Bobonaro.
“Ita bo’ot sira ne’ebé ohin hola parte iha formasaun ida-ne’e hanesan ajente estadu nian ita fó atensaun espesiál ba imi tanba sei servisu hamutuk ho autoridade lokál no entidade seluk atu hametin instituisaun no garante seguransa interna País nian foka liu ba funsionamentu no dezenvolvimentu setór seguransa”, esplika Francisco Guterres, iha Sentru Treinamentu 1° Sargento Aquelis da Silva-Rairobo, Postu-Administrativu Atabae, Munisípiu Bobonaro.
Nia dehan, mediadór sira iha área prevensaun konflitu sei sai hanesan mós konselleiru ba Autoridade lokal sira liliu lideransa komunitaria hanesan xefi suku, xefi aldeia, veteranus, lider relijioju sira, lia nain no-mós Polísia Komunitaria sira hodi promove estabilidade.
“Wainhira ita koalia kona-ba konseitu seguransa ho dezenvolvimentu maka presiza hatene uluk saida mak ita bele dehan seguru tanba ita bo’ot sira-nia servisu ida maka atu jere komunidade nia tauk ka halo ema labele tauk nune’e labele moris iha ameasa nia laran. Maibé importante liu maka ita boot sira tenke komprende didi’ak imi-nia papel no responsabilidade wainhira hahú hala’o servisu”, salienta.
Governante ne’e akresenta, mediadores nia knar prioridade maka sei identifika sinais konflitu sira ne’ebé akontese iha fatin ne’ebé sira servisu ba liu-liu hodi hametin nafatin mekanismu ba halo prevensaun konflitu no hari’i pas iha komunidade nia leet, husi kedas munisípiu to’o iha RAEOA (Rejiaun Aadministrativa Espesiál Oecusse Ambeno). (Fatinha/Elisa/AX).
