Dili, 20 maiu 2024 (SRP) – Ministru Interior, Francisco da Costa Guterres, Ph.D, partisipa iha Serimónia Komemorasaun Loron Restaurasaun Independénsia Timor-Leste ba dala XXII, ho tema “Hametin Instituisaun Estadu hodi Servi Povu”, ne’ebé hala’o iha Palásiu Prezidente Nicolau Lobato, Bairo-Pite.
Iha serimónia espesiál ida-ne’e, Prezidente Repúblika, José Ramos-Horta fó onra Grande Colar husi orden Timor-Leste ba Sultan Brunei Darussalam, Haji Hassanal Bolkiah, ne’ebé sai mós nu’udar konvidadu espesiál ba onra iha selebrasaun aniversáriu loron Restaurasaun Independénsia Timor-Leste ba dala 22.
Hola parte iha serimónia ne’e envolve Primeiru-Ministru (PM), Kayrala Xanana Gusmão, hamutuk ho estrutura tomak, Prezidente Parlamentu Nasionál ho membru sira, Prezidente Tribunál Rekursu, Eis Prezidente Repúblika, Taur Matan Ruak, no Eis Prezidente Repúblika Francisco Guterres “Lu-Olo”, Komandante Jerál PNTL, Komisáriu Jerál Henrique da Costa, Xefi Estadu Maiór F-FDTL, Tenente Jenerál Falur Rate Laek, Korpu Diplomata, sosiedade sivíl no-mós komunidade sira iha Kapitál Dili.
