RAEOA, 16 outubru 2023 (SRP) – Guvernu liu hosi Ministru Interiór, Francisco da Costa Guterres, Ph.D, hala’o enkontru ho Komandante Komandu PNTL RAEOA Superintendente polísia Nicolau Francelino da Costa ho nia estrutura tomak iha Santa Rosa Suku Costa Sub-Rejiaun Pante Makasar, hodi ko’alia kona-ba esforsu Guvernu hodi dezenvolve infraestrutura baziku iha liña fronteira entre Indonézia no Timór-Leste.
Governante ne’e rona mós preokupasaun sira ne’ebé hato’o husi Komandu PNTL RAEOA kona-ba difikuldade ne’ebé sira enfrenta hanesan menus rekursu, membru sira ne’ebe atinji ona antiguidade maibe laiha promosaun, rádiu komunikasaun, farda sira no liuliu kona-ba Komandu no Eskuadra sira ne’ebé presiza obra reabilitasaun.
Iha enkontru ne’e Governante ne’e hateten razaun prinsipal mai iha ne’e atu identifika problema sira kona-ba infraestrutura sira ba dezenvolvimentu PNTL nian no-mós preokupasaun sira komunidade nian, nune’e nia parte sei sei halo liña koordenasaun ho Ministériu no Instituisaun relevante sira hanesan Obras Públikas, Diresaun Terras no Propriedades no mos Ajénsia Dezenvolvimentu Nasionál (ADN), hodi finaliza planu hirak-ne’ebe iha ona nune’e bele dignifika no moderniza instituisaun PNTL.
Ukun na’in ne’e iha mós planu atu iha semana tuirmai, sei oreinta ekipa tekniku sira mai halo levantamentu dadus kompletu tuir planu ne’ebe iha nune’e bele halo klasifikasaun hodi hahu fazeadamente ba planu prioridade hirak ne’e.
Ho vizita ba Komandu PNTL RAEOA ida-ne’e, Ministru Interior remata ona vizita hale’u postu UPF hotu iha País ne’e hodi haree diretamente kondisaun instalasaun no dezafiu sira ne’ebé membru sira hasoru.
Tuirmai, Ministru ho nia ekipa, ho akompañamentu husi Komandante UPF Interinu, Superintendente Asistente Polísia, Carlos Moniz Maia, halo vizita ba iha Postu Integradu Fronteira Batugade no-mós Kuartel UPF Nu-Badak Batugade.
Iha okajiaun ne’e Komandante Carlos Maia, mós hato’o nia preokupasaun balu hodi husu apoiu halo instalasaun ba bee moos, ahi, ekran CCTV, ar kondisioandu ba armori, sosa makina teste droga, halo moru haleu, kazernas, rehabiltasaun edifisiu no rezidensia ofisial, nahe alkatraun iha resintu kuartel UPF nian.
Vizita ne’e hetan akompañamentu hosi Komandante Komandu Administrasaun PNTL, Superintendente Xefi Natercia Martins, Komandante Planeamentu PNTL Inspetor Ernest Martins, Diretór Nasionál Aprovizionamentu, João da Cruz, Xefi IT PNTL, Inspetór Xefi Polísia Deklino C. Marcal no-mós ekipa tékniku aprovizionamentu hosi Ministériu Interiór nian. # (Bui, Oscar, AX).
