KOMANDU JERÁL PNTL ORGANIZA CAR FREE DAY NO MARSA SAUDAVEL

Dili, 23 marsu 2024 (SRP)-Atu komemora aniversáriu PNTL ba dála 24, Komandu Jerál PNTL realiza eventu marsa saudavel no CAR FREE DAY, ne’ebé partisipa hosi siklista atus lima resin ne’ebé hahú hosi eis Embaxada Malaysia, Avenida Portugal no remata iha jardim Largo Lecidere, Bidau.

Primeiru Ministru (PM), Kayrala Xanana Gusmão, iha nia liafuan badak, apresia ho inisiativa ne’e no apela mós ba ema hotu atu hadomi malu no hakribi violénsia nune’e bele kria paz no estabilidade.

Entretantu, Ministru Interior, Francisco da Costa Guterres, Ph.D, husu ba komunidade sira iha kada suku no aldeia liu-liu joven sira atu ajuda PNTL hodi promove estabilidade no kria kondisaun diak hodi ema hotu moris seguru, demokrátiku no prósperu.

Iha fatin hanesan, Komandante Jerál PNTL, Komisáriu Jerál, Henrique da Costa, lori Komandu nia naran agradese ba Guvernu liuhosi Ministériu Interior, no parseria lokál no internasionál sira ne’ebé ho laran luak oferese ona premiu lubuk ida hodi realiza eventu ne’e.

Premiu hirak ne’ebé oferta ba Komandu PNTL liu hosi parseria mak hanesan, Maun Oka Laran Di’ak, Banku Mandiri, BRI, Telkomcel, Utama karya, Telemor, BTK, Metrolink, Linera, Sylvia no loja Lidwi. #AX