Dili, 15 novembru 2023 (SRP) – Ministru Interiór (MI), Francisco da Costa Guterres, Ph.D, partisipa reuniaun Konsellu Ministru (KM), hamutuk ho membru IX Guvernu Konstitusionál, ne’ebé prejidi husi Primeiru-Ministru (PM) Kay Rala Xanana Gusmão, iha sala reuniaun Konsellu Ministru Palásiu Governu.
Iha sorumutuk ne’e, Konsellu Ministrus aprova ona projetu Rezolusaun Governu, ne’ebé aprezenta husi Primeiru-Ministru, Kay Rala Xanana Gusmão, hodi nomeia José Telo Soares Cristovão, Maria Domingas Alves no Agostinho Letêncio de Deus, atu ezerse mandatu ida ba tinan lima, ho rejime dedikasaun eskluzivu, nu’udar Komisáriu Funsaun Públika. Konsellu Ministrus mós deside hodi indika Agostinho Letêncio de Deus nu’udar Prezidente Komisaun Funsaun Públika.
*****
Konsellu Ministru mós aprova projetu Dekretu Governu ne’ebé aprezenta husi Ministra Finansas, Santina José Rodrigues F. Viegas Cardoso, ba alterasaun daruak Dekretu Governu n.º 19/2022, iha loron 11 fulan Maiu, kona-ba klasifikadór orsamentál.
Diploma ida ne’e altera ona husi Dekretu Governu n. 11/2023, loron 25 fulan-outubru, maski nune’e, iha ámbitu prosesu preparasaun ba Proposta Lei Orsamentu Jerál Estadu ba tinan 2024, identifika ona nesesidade atu halo alterasaun adisionál ba klasifikadór ekonómiku despeza nian atu aumenta detallu no transparénsia iha kontas públikas. REMATA
