Díli, 21 Agostu 2023 (SRP) – Xefi misaun Organizasaun Internasionál ba Migrasaun (IOM sígla inglés) mai Timór-Leste, Ihma Shareef, akompaña hosi nia program officer Leonel Araujo, hasoru malu ho Ministru Interior, Francisco da Costa Gueterres, Ph.D, hodi ko’alia kona-ba oinsa haforsa Jestaun fronteira hodi garante futuru ida ne’ebe pozitivu liu ba Timor-Leste.
“Ha’u hanoin katak objetivu enkontru ida ohin ho exelénsia Ministru Interior ami kontinua ko’alia kona-ba kooperasaun servisu ne’ebé kontinua la’o hela nune’e kontinua halo aprosimasaun komprensivu ba iha jestaun fronteira nian inklui halo diskusaun ba iha trafiku umanu no sasukat sira ne’ebé destina ba kombate krime branqueamento capital (Le:Fase-Osan” ” dehan Xefi IOM, Ihma hafoin remata enkontru ne’e iha Ministériu Interior, Vila-Verde, segunda ne’e.
Tuir nia, Ministeriu Interior iha relasaun koperasaun ho parseria dezenvolvimentu sira iha Timor-Leste, iha nivel interese kolektivu atu promove kooperasaun ne’ebe diak hodi melhora kapasidade servisu haforsa fronteira.
“IOM sei servisu hamutuk ho Guvernu hodi fortalese setor jestaun fronteira no halo prevensaun hodi kombate krime fase-osan, finansimentu terorizmu no trafiku humanu iha Timor-Leste”, salienta.
Entretantu Ministru Interior, Francisco Guterres, agradese ba IOM tanba iha interese kolektivu atu promove kooperasaun diak hodi ajuda hadia sistema jestaun fronteira iha tinan balu nia laran liu-liu ajuda Guvernu Timór-Leste servisu makas hodi kombate krime no tráfiku umanu husi autór rede krime organizadu sira. #
Autor : Elisa
Editora : Fatinha
Fotos : Abui
