HATAMA SASÁN LIU DALAN ILEGÁL, MAKIKIT KAMAT SUSPEITU NAIN 3

Dili, 11 marsu 2024 (SRP) – Ekipa Makikit Dili, halo vizilánsia iha kapitál Dili no konsege kamat joven na’in 3 ne’ebé halo tranzasaun ilegál tama ho ró hosi portu Atapupu nudar sidade ida iha parte norte Timor Osidentál, provínsia Nusa Tengara Timur (NTT)-Indonézia ne’ebé fronteira kedas ho Timor-Leste.

Joven nain tolu ne’e ekipa makikit kamat ohin madrugada iha tuku 02:56, iha área Tasi Tolu, tula bebidas suplementu ne’ebé hatama mai ho bero hosi fronteira Atapupu hafoin tula iha Kamioneta ho marka Mitsubishi Fuso xapa matríkula 55.358.

Sidadaun mane na’in-tolu ne’e, mak MB (43), JPA (38) no AS (33) no iha suspeitu sira nia deklarasaun haktuir katak, alem de bebidas sasán iha tan sasán seluk ne’ebé hatun ona iha semana rua kotuk ba iha área Palaka, Postu-Administrativu Atabae, Munisípiu Bobonaro.

Entretantu suspeitu MB deklara iha fulan outubru no dezembru 2023 nia laran nia halo tranzasaun ilegál hatama sigarru no tabaku lulun, fulan fevereiru 2024 hatama Coca-Cola no inísiu fulan marsu hatama Kratindaeng ba dala tolu mak foin hetan kapturasaun.

Sidadaun mane na’in-tolu ne’e, agora daudaun Makikit 1 ho ekipa entrega ona ba Eskuadra PNTL Dom-Aleixo halo hela identifikasaun hafoin sei aprezenta ba Ministériu Públiku hanesan nain ba krime hotu. #AX