Manatuto, 25 outubru 2023 (SRP)– Sekretáriu Estadu ba Protesaun Sivíl, Domingos Mariano Reis, akompaña husi Diretór Jerál Administrasaun no Finansas, Mariano de Araújo no-mos kargus xefia sira, partisipa serimónia selebrasaun loron Mundiál ba redusaun risku dezastre ho tema “Promove Partisipasaun Grupu Vulnerabilidade sira (difesiente, idozu, feto no labarik ) iha redusaun risku dezastre ba rezilénsia ba moris di’ak iha Timor-Leste”, ne’ebé hala’o iha Kampu futebol, Suku Cribas, Postu-Administrativu, Manatuto Vila, Munisípiu Manatuto.
“Ohin Protesaun Sivíl Timor-Leste komemora hamutuk ho komunidade Manatuto espesialmente iha Suku Cribas, ita selebra aniversáriu ba loron mundiál redusaun risku dezastre iha Timor-Leste”, esplika SEPS Mariano, durante halo intervensaun iha Suku Cribas, Postu-Administrativu Manatuto Vila, kuarta (25/10/2023).
Nia dehan, razaun prinsipal hili Manatuto hodi sai fatin ba selebrasaun aniversáriu redusaun risku dezastre, tanba dadus dezastre iha Manatuto nia númeru kiik liu kompara ho munisípiu sira seluk iha Timor-Leste.
“Ba dala uluk hau hakarak fó hatene ba inan-aman sira, horisehik hau iha ne’e hau hatete katak Manatuto sai lalenok ba paz no dame iha territóriu Timor-Leste, nudar ita hotu hatene katak iha ita-nia rai sempre mosu bebeik dezastre iha territóriu tomak, iha udan makas ne’ebé sai kauza ba inundasaun, bailoron naruk no insendiu, iha Manatuto númeru ki’ik liu no ohin ita rekopera ho simbolikamente ne’ebé entrega materiál konstrusaun uma no ai-han husi xefe kaza sivíl ne’ebé reprezenta Prezidénsia Républika” dehan tan.
Superiór Administrasaun Públika ne’e salienta katak, pilár importante hodi responde dezastre naturais iha Timor-Leste, presiza refleta a’an, primeiru kostume autoridade protesaun sivíl ninian, iha misaun ida tenke alerta antesipada responsivu no adoptativu, dezastre ne’ebé mosu ita la espera mai ho derrepente.
“Loron 4 abril iha tinan 2021 liuba nudar referénsia ida nune’e mos impede dezenvolvimentu nasaun no estadu nian. Tanba ne’e risku dezastre sira ne’e mosu mai ne’e presiza tebes ita hotu nia esforsu a’an no servisu makas hodi minimiza no hakotu korrente dezastre nian iha Timor-Leste”, afirma.
Governante IX governu konstitusionál ne’e akresenta, orientasaun ba prevensaun dezastre tenke sai prioridade ita hotu nian, hanesan rai nakdoko, inundasaun, rai halai, dezastre ne’ebé labele prevene.
“Atu dehan mos katak dezastre bele akontese iha momentu saida deit, maibe antes dezastre sira ne’e mosu ita mos bele prevensaun liuhusi re-florestasaun, konserva bee matan, konserva tasi ninin, kuidadu foho no rai sira atu labele kontribui ba erozaun. Tanba ne’e presiza kolabora hamutuk hodi dezenvolve liután ita nia rai tanba agora daudaun ita enfrenta mudansa klimátiku”, tenik tan.
Komemorasaun loron mundiál redusaun risku dezastre tinan 2023 maka kampaña edukativu ba estudantes eskola EBC Aiteas no Cribas, expozisaun opsaun ba populasaun, aktividade kompetisaun sertame kona-ba promove partisipasaun grupu vulnerabilidade sira iha redusaun risku dezastre husi grupu komunidade suku Cribas, aktividade kompetisaun pinta, estudantes ensinu báziku Aiteas no Cribas, inklui sensibilizasaun fahe informasaun kona-ba multi perigu foku liuba El-nino.
Iha ámbitu selebrasaun loron Mundiál ba redusaun risku dezastre tinan 2023 ne’e entrega mós premiu ba manan nain sira, primeiru lugar grupu husi aldeia Taiketu, segundu lugar aldeia Ranak, terseiru lugar grupu husi aldeia Atahok, kuartu lugar grupu husi aldeia Ebani no kintu lugar grupu husi aldeia Taunua Suku Cribas no entrega premiu ba estudantes manan nain ne’ebé kompete iha kompetisaun pinta.
Iha biban ne’e, entrega mós apoiu materiál konstrusaun ba vítima dezastre insendiu no anin sobu hamutuk 30 resin inklui asaun karidade fó apoiu asisténsia umanitaria hanesan foos, mina no seluk ba grupu vulnerabilidade sira ho simbolikamente.
Selebrasaun loron mundiál ba redusaun risku dezastre ensera ho simulasaun kona-ba oinsá halo prevensaun bainhira mosu dezastre naturais no insendiu.
Seremónia ne’e, konta ho prezensa husi Komandante Jerál PNTL, Komisáriu Henrique da Costa, Prezidente Komisaun Funsaun Públika, Faustino Cardoso Gomes, Xefi Kaza Sivíl Prezidensia Repúblika, Sekretariu Estadu Komunikasaun Sosiál, parseiru sira husi ajénsia Nasoens Unidas, Kruz Vermelha Timor-Leste, Komandante Protesaun Sivíl husi 13 Munisípiu, Unidade sira ne’ebé tutela ba Sekretariu Estadu Protesaun Sivíl, militar, Administradór Munisípiu Manatuto ho nia estrutura tomak, funsionáriu sira husi Ministériu Interior no-mós komunidade sira iha Suku Cribas. #Fatinha
