Dili, 04 juñu 2024 (SRP) – Ministru Interior, Francisco da Costa Guterres, Ph,D, simu vizita kortezia ida husi Embaixadór Timor-Leste ba iha Japaun, Ilídio Ximenes da Costa, hodi koalia kona-ba relasaun no kooperasaun país rua nian ligadu ba investimentu ba setór seguransa ne’ebé konsidera importante tebes atu dezenvolve.
“Enkontru ida ohin hodi ko’alia asuntu importante rua, ida kona-ba ajudus ne’ebé Governu Japaun atu fó ekipamentus ba iha Governu Timor-Leste liuhosi Ministériu Interior, mak hanesan Roo atu halo patrullamentu iha Costa Sul. Ita iha duni Ro dunik maibé ita nia Unidade Polísia Marítima labele halo patrullamentu to’o iha ne’ebá tanba tasi ho laloran ne’ebé mak bo’ot, ho ida-ne’e mak sira prontu atu fó apoiu. Segundu maka kona-ba Dezastre Naturais ninian, tanba Governu Japaun mós atende ho situasaun sira hanesan ne’e” hateten Ilídio Ximenes, hafoin remata enkontru ne’e iha Ministériu Interior,Vila-Verde, tersa ne’e.
Nia dehan, bazeia ba planu estratéjiku governu nian ba konseitu ekonomia azul maka presija mós apoia balu hosi nasaun parseria sira hodi fasilita di’ak liután kondisaun mínimu ne’ebé Autoridade Nasionál Marítima sira enfrenta.
“Agora hosi diskusaun sira ne’e, Governu liuhosi Ministériu Interior bele dezenvolve proposta ruma ba iha Embaixada hodi hatutan ba iha Governu Japaun atu bele hetan ajudus. Tanba hau mós koalia ona ho Eis Ministru Defeza Gen Nakatani hodi apoiu Ró bo’ot ba Governu Timor-Leste”, subliña.
Tuir Ilidio, Guvernu Japaun laos apoiu de’it ba setór Marítima maibé mós prontu fó apoiu ba Prevensaun Konflitu no-mós formasaun ba PNTL hodi koresponde ho filozofia polítiku polísia komunitariu nian.
“Hau mós konvida Ministru Interior atu bele hala’o vizita kortezia ba Japaun hodi bele hasoru mós Ministru Interior no Ministru Defeza Japaun nian, nune’e bele hametin kooperasaun servisu entre nasaun rua no-mós ko’alia asuntu kapasitasaun rekurzus umanus PNTL nian iha futuru”, tenik tán.
Diplomata timor oan ne’e salienta, ho vizita direta ba Japaun maka sei fahe mós esperiénsia kona-ba lala’ok servisu seguransa nian liuhusi papél signifikativu nian iha avansu ba progresu dezenvolvimentu hodi atinji meta globál sira no parte rua ne’e buka atu esplora tán área kolaborasaun nian hodi hametin relasaun iha futuru.
Antes termina embaixadór ne’e mós rekuñese Japaun nia apoiu ba DNPKK (Diresaun Nasionál Prevensaun Konflitu Komunitaria) liu husi UN Women hafoin iha tinan badak nia laran hatudu rezultadu ne’ebé maka di’ak, tanba Timor-Leste segundu pais depois Japaun ne’ebé maka iha rasik nia Planu Asaun Nasionál ba Rezolusaun 1325 kona-ba Feto Pas no Seguransa (PAN RKS 1325). #SRP
