Dili, 23 dezembru 2023 (SRP) – Ministru Interior, Francisco da Costa Guterres, Ph.D, halao enkontru ho funsionariu kontratadu no ajente administrativu hamutuk 69 hodi ko’alia kona-ba avaliasaun servisu no renovasaun kontratu ba tinan foun 2024.
“Ohin bolu ita bot sira mai ita halo enkontru hamutuk laos atu duni sai maibe atu ko’alia kona-ba progresu servisu no-mós prestasaun servisu saida mak imi halo durante tinan barak servisu iha Ministériu Interior no imi nia servisu atu kontribui ba estadu ne’e saida”, esplika Ministru Francisco Guterres, iha sala enkontru Servisu Migrasaun Vila-Verde, sabadu ne’e.
Nia dehan, servisu sentral Ministeriu Interior nian ne’e natureza operasional ho nia papel mak kria paz hodi kontribui ba dezenvolvimentu.
“Imi tenke aprende hatene imi nia papel no presija hatene ita nia planu estratejiku seguransa interna ba tinan 2030, tanba planu ida ne’e hau monta iha tinan 2009. Maibe agora hau hadia fali atu ema moris hakmatek respeita ema seluk nia direitu hodi fasilita dezenvolvimentu. Tanba ne’e imi nia kontribuisaun ba dezenvolvimentu ne’e importante”, afirma.
Govenante ne’e hateten desde asume kargu nudar Sekretariu Estadu Seguransa durante tinan tinan hitu resin nia reorganiza kargu no xefia lahare ba kor no rasa.
“Tinan hitu ho balun hau nia diretor jeral sira kor ketak. Hau hili feto mak lidera halo kampaña kona-ba violensia no sensibilizasaun ba prevensaun konfilitu tanba laos kestaun partidu maibe kestaun estadu no sira mai ho kapasidade intelektual hodi kria hakmatek iha sosiedade nia let. Entaun imi mos tenke sai hanesan ne’e hodi kontribui ba paz nune’e dezenvolvimentu bele lao” salienta.
Ministru Francisco konta tuir katak, publiku hasai kritika hasoru funsionariu kontratadu sira tanba kestaun familia la halaó servisu ho diak no balun tama servisu halimar deit la tuir oras, balun tur dada lia iha liur horas toó fila ba uma, toó fulan simu saláriu.
Funsionáriu kontratadu sira rona hela espelikasaun husi Ministru Interior kona-ba renovasaun kontratu
“Estadu ne’e hari ho ran no ruin no jerasaun tuir mai ne’e tenke kontribui hametin hela estadu ne’e tanba ita jura ne’e ba estadu entaun tenke loyal deit ba estadu. Husu ba imi servisu deit ba estadu ida ne’e tanba ema wain la menikmati. Avaliasaun dezempeñu imi nian minimu nudar servidor públiku nian ate seidauk komprende lei funsaun publikanian kona-ba síjilu hodi fo sai fali dadus internal ba konsumu publiku. Ema barak hasai kritika hasoru ita bot sira dehan hasai sira hotu maibe hau husu deskulpa hau sei fo oportunidade ba imi fulan nen tan para obriga malu atu servisu” subliña.
Maske nune’e, Francisco fó hanoin nafatin ba funsionáriu kontratadu hirak ne’e atu hatudu nafatin dezempeñu di’ak iha servisu fatin maibé karik viola regra no abandona servisu maka nia parte sei foti medida ruma.
“Imi ajusta imi nia an ba situasaun ida ne’e hodi hatudu ezemplu diak ba funsionariu permanente sira. Imi konta ho hau ita lori Ministeriu Interior lao ba oin. Karik prafuzu ruma mak ladiak ita tenke troka. Ida ne’e laos ba deit ajente administrativu maibé permanente mós kuandu sala ita rekomenda hodi hasai”, nia fo alerta.
“Hau mai laos atu hasai maibe ejiji imi atu halo servisu hanesan mos povu no Primeiru Ministru ejiji hau atu serve povu ida ne’e. Tanba ne’e prepara ba ita avansa hau fiar katak buat hotu sei lao diak. Hau konfia imi no fiar katak imi esperiensia barak ona ajuda komunidade sira tanba ne’e sei prepara fali imi nia kontratu foun”, tenik tan.
“Ikus liu hau nia Natal kmanek no deseju ba imi ajuda kontribui paz domin no estabilidade para ema hotu selebra ho diak, komprimentu ba ita bot sira nia familia no lori ita bot sira nia familia ita sei natal hamutuk iha 28 hodi halo mos reflesaun ba ida idak nia an ho rezolusaun foun iha tinan 2024”, hakotu. #(Elisa/Oscar/AX).
