Manatuto loron 22 fulan dezembru 2023 (SRP)- Diretór Jerál Siguransa Prevensaun Konflitu, Gaspar Pereira de Sousa akompaña husi Diretór Gabinete Planeamentu Estratéjiku (GPE), Bendito José Casimiro sexta feira ne’e hala’o abertura Formasaun kona-ba Lideransa Transformativa, Prevensaun Rezolusaun Konflitu no mediasaun sensivél ba jéneru, iha salaun enkontru Cruz Vermelha Timor-Leste.
Formasaun ne’e ho objetivu atu reforsa kapasidade no koñesimentu funsionáriu sira ne’ebé iha potensia atu sai lider atu lori bá oin igualdade jéneru, no ajenda direitu feto iha kontestu organizasionál hanesan hatuur-hakerek ona iha enkuadramentu normativu nasionál no internasionál sira. Formasaun ne’e sei buka atu reforsa sira-nia kapasidade atu utiliza prinsípiu no prátika lideransa transformativa hodi hatán ba prejuizu. Lideransa transformativa mak rekoñese tiha nu’udar xave importante atu promove igualdade jéneru.
Iha abertura superiór prevensaun konflitu ne’e salienta katak formasaun ida-nee anteriormente lao ona no, agora hanesan faze kontinuasaun husi Diresaun Nasionál Prevensaun Konflitu Komunitaria. programa ne’ebé planeadu ona iha OJE 2023 nian. Kontinuasaun iha tinan ida-nee hala’o iha Munisípiu Bobonaro, Manatuto no Baucau, hanesan mós faze ikus nian ba programa tinan ida-nee.
“Formasaun ne’e laos para iha ne’e deit, iha tinan oin sei kontinua, husu ba diretór, xefe munisípiu sira servisu hamutuk ho ekipa formadór sira husi nasionál atu bele identifika funsionáriu sira ne’ebé seidauk tuir nune’e sira mós bele hetan oportunidade hanesan hodi bele hatene kona-ba materia prevensaun edukasaun transformativa liuhusi sensibilizasaun sira”, dehan Diretór jerál.
Formasaun lideransa transformativu atu kontribui ba servisu ho diak liután kona-ba koñesimentu mediadór sira nian hodi halao servisu ho diak hodi kontribui ba hametin paz no redusaun konflitu iha komunidade sira-nia leet.
Funsionáriu bombeiros partisipa iha formasaun kona-ba lideransa transformative iha Munisípiu Manatuto
“Ita-nia funsaun mak sai hanesan mediadór iha komunidade sira-nia nia leet liuhusi rekolla dadus, rona hanoin husi parte hotu, transforma ema nia hanoin, kria ambiente amigável ho ema hotu, sai jestór diak ba ema hotu hodi transforma mentalidade ema nian sai diak liután, Hau husu ba funsionáriu sira tenke akompaña materia ne’ebé mak sei lori husi formadór nasionál sira nune’e sai hanesan referénsia no bukae hodi prepara aan servisu hamutuk ho komunidade sira tanba ita mak hanesan liman, matan, tilun no ibun estadu nian. Hanesan mákina estadu tenke asumi responsabilidade transformativa ba ema hotu.”dehan Diretór Jerál Seguransa Prevensaun Konflitu.
Materia sira ne’e simu rai iha pratika, aleinde ida-nee, buka aprende liuhusi lee barak, aprende husi ema hodi transforma ba ema seluk tuir kbi’it tuir mata dalan sensivél ba jéneru.
Pratikamente ita bele halo tuir buat ne’ebé mak hato’o husi formadór sira. Aleinde ida-nee mós seguransa patrimoniu públiku ne’e tutela iha Diresaun Siguransa Prevensaun Konflitu nia okos husu ita bo’ot sira tenke responsabiliza másimu no labele abandona servisu iha terrenu.
“Hau sei la tolera funsionáriu sira ne’ebé mak abandona servisu iha terrenu no sekarik ita bo’ot sira abondona servisu mak sei fó sansaun rigorozu ba ita bo’ot sira, dehan Diretór Jerál.
Entretantu partisipante ba formasaun ne’e hamutuk 30 mai husi funsionáriu Diresaun Nasionál Seguransa Patrimoniu Públiku (DNSPP), Funsionáriu husi Bombeirus inklui Cruz Vermelha Timor-Leste husi Munisípiu Manatuto.
Formasaun ne’e hala’o durante loron rua hahú husi 22-23 dezembru, ne’ebé fasilita materia husi fasilitadór Joaquina Soares, Januario Brites inklui formadór balun husi SEI. Iha ne’ebe fasilitadór Januario Brites lori materia Mata Dalam Mediasaun sensivél ba Jéneru no fasilitadora Joaquina Soares aprezenta materia kona-ba Rezolusaun Konflitu no, formadora SEI aprezenta kona-ba Lideransa Transformativa.# Fatinha.
